Marlon Sneek ta constata cu:

Den e ultimo dianan nos por a lesa den diferente matutino y tambe nos por a scucha na diferente radio un noticia cu ta laga bo cabeynan reis. Aruba dia pa dia ta bayendo di malo pa pio. Nos por a nota con “friends and family” a penetra den organisacion pa logra metanan politico, un lider ta bisa cu e mester duna su jiu trabou pa e no bira delincuente, otro ta coi su jiu landado dun’e studie opdracht pa e bay studia pa dentista. Awor e parlamentario no kier keda atras. E ta hanja bon pa bay pone precion pa su jiu no keda sinta den 1e klas. Meneer, ta ki ehempel bo ta pa bo jiu? Di chikito caba bo ta siñando e cu e no mester haci su best pa logra algo den bida, paso toch su tata tey pa resolve tur cos, hasta logra pa e bay over. Ki berguensa. Anto un parlamentario! Ki ehempel bo ta pa e pueblo aki? Ora cu bo tira bo speechnan, mi ta wanta mi curason y awor bo ta comete e ekibocacion di mas grandi den bo bida.

Kiermen den opinion di e parlamentario aki nos por wel di manda tur maestro cas paso toch ta e ta disidi si su jiu ta bay over o laga. Con a para cu e otro muchanan cu nan mayornan no ta parlamentario y si mester a keda sinta? Nan tambe por bay over awo? Y e trabou di e maestronan, tampoco tin balor mas? Pakico e maestro ta bay duna extra tempo di dje pa traha cu e mucha y mustr’e con pa lucha pa logra? Si al fin al cabo ya ta disidi cu e mucha lo pasa di clas cu of sin merito.

Mi no sa ta te na unda e hendenan aki tin pensa di jega, pero algo asina ta di spera di e integrantenan di M.E.P. Si nos por corda dia cu maestronan a sali caya pa lucha pa nan derecho, gobierno no a ni mandanan corte pa bay traha bek. Gobierno no tabata interesa mes den ensenansa. Awor nos ta wak dicon, paso pa M.E.P maestronan no ta importante! E trabou asina importante di un maestro no tin balor pa nan, paso toch nan jiunan lo bay over y lo hanja trabou cu salario gordo pa nan no bira delincuente!

Unda minister di enseñansa a keda den tur e cos aki?
Unda inspecion di enseñansa a keda?
Unda directiva di scol a keda pa defende su trahador (maestro y cabesante) ?
Ken ta responsabel pa e tipo di cosnan aki?

Despues di welga si a core manda carta pa scolnan bisa cu maestronan cu a welga no mag di bay “school reisje” cu nan klas. Manera cu ta e maestronan nan ta straf, sin sa cu ta e muchanan ta wordo perhudica. Paso si boso no tabata sa, sino ta pa e momentonan cu e maestronan ta Sali cu e muchanan, vakantie ta cuminsa y caba e mucha sin bay ningun caminda esey ta e realidad cu nos ta biba aden aki na Aruba. Anto tipo di disparatenan aki si ningun musca no ta bula foei!

Esaki ta cosnan cu tin nos Aruba daña, personan den posicion clave no ta lanta para y stop bagamunderia, nan ta prefera di baila manera nan toca panan pesey e pais aki ta caminda e ta awe, boso tambe ta parti di e decadencia aki.