Atencion special pa ensenjanza avansa y comunitario

Temanan den Presupuesto Alternativa di AVP y Rapport di FESCA

Lider di AVP, mr. Mike Eman a reuni cu Marja van Bijsterveldt (CDA), Staatssecretaris di Ensenjanza den un serie di reunionnan cu Eman ta atendiendo na Hulanda relata na temanan cu AVP ta mira como prioridad pa futuro di Aruba. Cu Staatssecretaris Bijsterveldt e lider di AVP, mr. Mike Eman a papia riba strategianan aplica na Hulanda pa cu ensenjanza riba nivel di MBO y HBO. Esakinan pa alcansa e mihor calidad posibel pa un economia competitivo y pa responde na e nececidad di e mercado laboral. E ultimo rapport di FESCA riba Economia di Aruba tambe a enfatisa e nececidad di calidad y di e syncronisacion aki.

Mr. Mike Eman a enfatisa serca e Staatssecretaris tambe e preocupacion pa cu reconocimento di diplomanan di schoolnan y institutonan di Ensenjanza di Aruba y e problematica di pagamento di fianza pa estudio. Eman a atende e ultimo dos puntonan aki tambe cu Minister Plasterk.

Un topico cu Eman a profundisa tambe riba dje cu Staatssecretaris Bijsterveldt ta e introduccion di “maatschappelijke stage” den curriculum di school. Ta trata aki di stage pa inculca den e hoben responsabilidad civico.

Den e Prespuesto Alternativa di AVP ta worde crea henter e infrastructura pa cuminsa introduccion di “maatschappelijke stage” manera cu Staatssecretaris di Hulanda pa Ensenjanza, Marja van Bijsterveldt a introduci na Hulanda den e programa “Maatschappelijke Stage, Samen leven kun je leren”. Esaki ta sosode via schoolnan secundario caminda studiantenan ta haya como parti di nan curriculum escolar experiencia comunitario dor di core stage den ambiente cu ta cultiva e sentido di responsabilidad civico y comunitario. Ta trata aki di por ehempel casnan pa anciano, pa handicap, Rode Kruis, hospital, centronan di rehabilitacion y tambe trabao social y deportivo pa formacion di mucha. AVP a presenta esaki den cuadra di e atencion pa e nececidad pa reinforza e sentido civico y comunitario den nos pais atrobe. Ta mira schoolnan como un lugar adecuado pa juda inculca e sentido civico aki den un forma structura den nos hobennan. Estudionan cu fraccion di AVP a haci riba e materia aki y e experiencia tanto na Hulanda cu “maatschappelijke stage” como na Merca cu “service learning” a mustra cu ta importante pa e “stage” aki sosode bao guia di school y forma parti di un curriculum di school. Ta trata di un otro stage cu esun cu ta dirigi riba prepara e hoben directamente pa un profesion specifico, aki ta pa trata di un stage pa juda den formacion di e hoben su caracter, su interes y responsabilidad civico y comunitario. Den un mocion cu AVP a presenta tambe durante tratamento di presupuesto di ensenjanza tur fraccion a bai di acuerdo cu e proposicion pa cu introduccion di “maatschappelijke stage” na Aruba.

Staatssecretaris Bijsterveldt a entrega e lider di AVP, mr. Mike Eman, e “Plan van Aanpak” cu Staatssecretaris Bijsterveldt a utilisa pa introduccin di “maatschappelijke stage” na Hulanda. Mr. Mike Eman a gradici e Staatssecrtaris pa a comparti su experiencia y experticio cune, locual sigur ta juda Aruba den e proceso di formacion di pensamento y desaroyo di ideanan riba maneho nobo pa eleva e calidad di nos ensenjansa y di tur locual nos hobennan ta sinja den anjanan di formacion na school.