Mike de Meza Y Donny Rasmijn

Alternativanan presenta den e congreso ta paralel cu esunnan di AVP

Actualmente Parlamentario Mike de Meza y miembro di partido AVP, Donny Rasmijn ta na Bogota, Colombia atendiendo un congreso mundial riba crisis di energia. Den entrevista cu Mike de Meza el a comenta cu ta trata aki di un congreso caminda paisnan Andino, di Centro America y Caribe ta participando en buskeda di posibel solucionnan pa cu e problematica creciente di costo di energia.

El a comenta cu mayoria di e paisnan aki por wordo cataloga como autosuficiente, caminda cu nan ta dispone di petroleo, gas natural, carbon, agricultura, cria y pesca, pero a pesar di esaki nan tambe ta sufriendo e efectonan negativo di aumento drastico di e prijs di petroleo y tur su derivadonan.

Den e congreso aki ta tratando e situacion actual, e posibel alternativanan cu lo por tin, e pasonan cu e diferente paisnan por tuma pa suaviza e efectonan pisa, e transparencia cu mester existi tanto di parti di e companianan di utilidad como di gobiernonan pa cu maneho di e situacion aki, e diferente posibilidadnan di energia alternativo y mas ainda e importancia di cooperacion y dialogo nacional caminda ta involucra tur actor pa asina yega na un solucion cu ta wordo acepta pa tur hende. De Meza ta expresa cu tur e puntonan aki presenta den e congreso internacional aki ta puntonan cu partido AVP a bin ta presenta for di basta tempo caba, pero ta parse cu Gabinete Oduber no tin oido pa cu nan, a pesar cu diferente foronan y congresonan mundial ta indica cu esaki ta e camida pa cana.

Den e mesun cuadro aki por menciona cu Mike de Meza y Donny Rasmijn a papia cu diferente ehecutivonan grandi, manera e director di energia di Colombia, ehecutivonan di Petrobras y tambe e organizadornan di e congreso aki cu a mustra interes pa organiza un tipo di congreso internacional asina na Aruba mes.

Conociendo e importancia cu e parlamentario di AVP ta duna na e tema di energia, el a cuminsa cana e caminda pa en berdad por logra un tipo di congreso asina na Aruba, cual di un banda lo ta bon pa nos isla riba aspecto turistico, pero mas ainda pa mustra na nos mesun isla e importacia di e necesidad pa atende cu e situacion critico aki cu un caracter di urgencia, pasobra manera a wordo presenta tambe den e congreso, ta trata di un problema cu por lo pronto lo sigui crece y no ta mira solucion a corto plazo pe.

Mike de Meza a comenta tambe cu por mira con e paisnan grandi ta aserca otro pa mira e posibilidadnan di cooperacion riba e tereno di energia, y manera el a bisa anteriormente, ta paisnan cu por wordo cataloga como autosuficiente. Esaki ta lanta mas preocupacion serca dje pa loke ta nos isla, pasobra nos cu ta depende totalmente di importacionnan no ta haciendo absolutamente nada pa atende cu e crisis aki, lo cual ta pone nos den un situacion mas desventahoso ainda.

Finalizando parlamentario di AVP a indica cu ta tristo pa mira cu e unico representantenan di Aruba den e congreso importante di energia aki ta su mes y su colega di partido Donny Rasmijn, pero di otro banda ta ilustra cu partido AVP ta e unico cu ta dunando e importancia necesario y ta preparando su mes pa por atende cu e crisis energetico aki na momento di asumi e responsabilidad di gobernacion otro aña, y hasta si por promer, pasobra no por sigui drumi riba esaki a no ser cu intencion ta pa zink Aruba.

Mas articulo relaciona cu e topico aki: