AVP - CRISTIAN DEMOCRATA ARUBA
   

Parlamentario Otmar Oduber ta mustra ariba e hecho cu...
Di 171 RAPPORT TRAHA PA CAD FOR DI 2003,
PARLAMENTO NO A HAYA CASI NINGUN

Aparentemente Minister Swaen ta scondenan
Home > Centro di Prensa > Noticia > 20080710b
 

Durante conferencia di prensa di fraccion di AVP den sala di Parlamento, Otmar Oduber a duna di conoce cu e fraccion a tuma algun decision mirando cu e circunstancianan pa loke ta trata diferente proyectonan na Aruba ta carga un preocupacion masha grandi di e fraccion y tambe di instancianan cu tin cu controla y vigila e diferente trabounan aki. Mirando cu dentro di algun dia Parlamento di Aruba ta bai den reces di 6 siman, a ponenan a tuma un decision di saca tres carta cu a wordo dirigi pa Presidente di Parlamento. Den un di nan ta solicita den forma urgente un reunion publico riba e proyecto di Dump tocante e implementacion di e solid waste management facility na Parkietenbos. Tambe un peticion cu fraccion di AVP a haci pa un reunion publico pa trata e asunto di AZV cu ta bira cada dia mas preocupante, caminda cu informacion keto bai ta sali cu e sumanan cu ta wordo premira pa loke ta e deficit di AZV ta sigui crece. Na e momentonan aki ta papia di deficitnan cu ta core den careda di 35 miyon florin y pa 2009 ta premira cu lo yega na sumanan riba 40 miyon di deficit.
 

Mirando cu a haci un cantidad di pregunta y e actitud di Minister di Finansa pa wanta atras pa wanta documento, particularmente pa loke ta trata e relato anual di AZV, a dicidi di pidi un reunion publico.
 

E otro carta cu a manda pa Presidente di Parlamento ta riba un asunto cu ta carga un preocupacion hopi grandi den fraccion di AVP y cu a vocifera na diferente ocasion na un forma pacifico, pero mirando cu no a haya resultado a truma e decision ayera mainta pa atraves di Presidente di Parlamento dirigi un carta na Controlaria General caminda ta solicita for di nan pa definitivamente haya e lista di 4 punto:
 

cuanto investigacionnan y rapport ARA a produci of tin riba agenda pa produci basa riba e raportahenan di CAD desde aña 2003. Otmar Oduber ta indica cu motibo di e pregunta aki ta debi cu na diferente ocasionnan a pidi gobierno pa ricibi e rapportnan di CAD (esun cu ta investiga maneho financiero y e doelmatigheid di gobierno) y na ningun ocasion Minister Nilo Swaen kier a entrega e rapportnan aki na Parlamento. Den ultimo lunanan AVP a bin ta haya un cantidad di raport di CAD cu a wordo scondi pa Parlamento di Aruba, un total di 171 rapport traha for di 2003 te cu juli 2007. ARA ta e instancia cu ta controla e rapportnan di CAD y ta e unico instancia cu por conseha y duna rapportnan directamente na Parlamento di Aruba y ta poco ta e rapportnan cu nan a ricibi.
   

Si por a ricibi e rapportnan of investigacionnan cu ARA a haci desde 2003 basa riba rapportnan di CAD. Aki Oduber ta bisa cu ta bai duna ARA e beneficio di duda, pasobra por ta e rapportnan tey y p’asina nan por ricibinan.
   

Si por ricibi un lista di tur e rapportnan sin excepcion y no mara na CAD, pasobra ARA por haci ‘gevraagd of ongevraagd’ investigacionnan y traha rapportnan, y ademas haya un copia di tur di nan desde 2001 p’asina Parlamento por tin un bista riba nan.
   

A pidi si ARA por comparti su opinion profesional riba e contract nobo cu a wordo sera cu e mesun grupo di Bouldin & Lawson pa cu proyecto di Dump sin cu a bai Parlamento di Aruba pa aprobacion. Ademas di a regala placa cu e compania mester a paga como boet debi na retraso di e proyecto.
 

Segun Otmar Oduber e carta aki ta den cuadro di e protesta cu nan a mustra den diferente ocasion pa cu Controlaria General, pasobra ya caba pa 7 aña practicamente Parlamento no por haya ni un rapport pa controla y vigila e gobierno cu ta sinta. Te cu december pasa ainda nan ta haya rapportnan riba Fondo Desaroyo San Nicolas, ta haya pedidonan riba rapportnan cu a wordo investiga caba dor di propio gobiernonan cu tabatin den pasado y riba peticion di propio gobierno.
 

Despues di esaki e ta menciona cu bou di gobierno actual tin diferente iregularidadnan pa investiga manera esun di centro medico, implementacion di fase 1 di Parkietenbos, desastre den Landslaboratorium caminda cu hasta casonan penal tin, entre otro, pero no tin ni un rapport di ARA pa duna Parlamento e hermentnan pa controla y vigila e gobierno aki.
 

Pesey Oduber ta bisa cu a yega ora pa den un forma habri mustra riba cuanto responsabilidad kier pone riba Controlaria General, particularmente den e discusion cu tin na e momentonan aki pa loke ta yenamento di e vacaturanan cu ta existi na e instancia aki.
 
 
 
 

top