A pesar di ta un noticia positivo

Otmar Oduber a mustra interes di e aerolinea pa bin Aruba

 for di casi 3 aña pasa

Parlamentario di partido AVP ta sumamente positivo pa cu e noticia ariba introduccion di vuelonan di COPA Airlines for di Panama. For di casi 3 aña pasa caba na diferente ocasion parlamentario Oduber a conversa cu Minister di Turismo ariba e topico aki. E la indike cu COPA Airlines tin interes di pa bula pa Aruba. E tempo ey, pa straño cu por zona, e minister no tabata ni na haltura cu den maneho halto di COPA Airlines Aruba tabata figura den e promer 5 destinacionnan cu nan lo interesa den yega na un acuerdo cune pa por cuminsa bula.

Otmar Oduber a presenta esaki den Parlamento mirando cu tabatin hopi contacto cu ehecutivonan di COPA Airlines. Lamentabelmente e minister no tabata sa e envergadura di COPA Airlines pa e area aki y particularmente pa e area di Centro America. Segun Oduber, cu den tratamento di diferente presupuestonan el a presenta esaki mirando cu COPA Airlines na e momentonan aki ta un di e aerolineanan mas fuerte cu tin den Centro America. E market share cu nan tin na e momentonan aki lo ta uno sumamente strategico pa Pais Aruba.

Oduber ta considera cu Minister di Turismo a tarda demasiado pa yega na un acuerdo cu COPA Airlines, ya cu a tarda casi 3 aña promer cu a concretiza esaki, a pesar cu Oduber a adverti e minister na varios ocasion di e interes di e aerolinea Panameño aki. Mas aleu, Otmar Oduber ta bisa cu e importancia no ta solamente pa tin COPA como hub pa Panama cu lo por ta e vehiculo pa Latino America manera cu e ta wordo presenta. Oduber ta kere cu e ta un vehiculo pa habri mercadonan manera Costa Rica y otronan cu ta hopi importante pa nos por haci uso di nan.

Pero mas ainda e ta bira un alternativa pa esnan di Europa cu kier yega te Aruba. Oduber ta bisa esaki pasobra na e momentonan aki COPA Airlines tin un di e hubnan mas importante for di Europa pa diferente destinacionnan, incluyendo otro isla y paisnan cu ta competencia pa Aruba. Otmar Oduber ta felicita AHATA y demas cu a logra yega na e acuerdo aki, pero na mes momento e ta remarca cu ta muestra un biaha mas cu gobierno no ta poniendo e enfoke na unda mester y ora mester, no tin un vision pa loke mester bira nos turismo pa futuro. Mas importante ainda ta e problema di airlift cu nos a confronta e ultimo temponan, pasobra esaki ta un deal cu mester a keda cla cune un par di aña pasa y por a evita e problemanan cu airlift.

E Parlamentario di AVP ta considera cu mester por diversifica e aerolineanan cu por bin for di diferente mercado pa Aruba. Segun e parlamentario e competencia ta hunga un rol dentro di e aerolineanan y esaki lo beneficia Aruba, pero tambe e turista cu kier haci viahenan largo p.e. for di Europa.

Oduber ta conta cu loke ta tuma lugar na e momentonan aki tin di hasi cu e prijsnan halto di pasashi conhuntamente cu e prijsnan halto cu nos tin caba como destinacion. Aruba a bira, pa motibo di su prijs, un destinacion inatractivo pa e turista cu lo kier bin for di un pais cu mester haci transito promer cu yega nos isla. E ta kere cu e apertura cu COPA, no solamente lo habri mercadonan nobo, caminda cu por ta no mester inverti mucho placa den dje pa haci mercadeo. E mester tambe trese un ‘competitive edge’ mas grandi pa Aruba como destinacion y tambe pa e turista cu ta dicidi cual ta e destinacion cu el lo kier escohe pa su viahenan.