Segun Mike Eman y Staatssecretaris Jack de Vries:

Ora cu nan jega 30 aña ta dificil pa sigui nan carera den Arumil

	Mike Eman	Jack de Vries
	Lider di Fraccion di AVP	Secr. di Estado di defensea

ORANJESTAD - Durante di conferencia di prensa di e siman aki, lider di AVP, Mike Eman a duna un relato amplio di su viaha pa Hulanda. Un di e puntonan cu e ta haya hopi importante pa trece dilanti ta e combersacion cu e a hiba cu Staatssecretaris di Defensa Jack de Vries. Un di e topiconan mas importante di e combersacion ta e situacion di Arubianonan cu ta den servicio militar aki na Aruba (Arumil).

Hopi di nan, ora nan jega e edad di 30 aña, nan no tin oportunidad pa continua un carera militar. E unico excepcion ta si nan drenta officieropleiding cu tin exigencianan hopi halto, ta bastante dificil y ta na Hulanda tin cu continua cu ne.

Hopi di e militarnan Arubiano kier sigui den un carera den e cuerpo militar na Aruba, pero na edad di 30 aña e no ta posibel mas. E peticion di Mike Eman na Staatssecretaris de Vries tabata ta pa sa cua ta e oportunidadnan cu nos por habri pa e Militarnan Arubiano, pasobra segun Mike Eman, "nan ta resaltando den nan diciplina, den nan forma profesional di sirbi den e cuerpo militar di Reino y toch ora nan jega 30 aña ta bira dificil pa nan continua."

Di parti di Staatssecretaris Jack de Vries e sa di e preocupacion aki, e lo tin su atencion y e ta bay mira kiko por hasi pa trece mehoracion den e situacion di e militarnan Arubiano. Segun sr. Eman e lo ta den contacto cu Staatssecretaris de Vries pa sigui e desaroyonan.