Parlamentario di AVP, Otmar Oduber:

E kier pa bin mas hotel manera RIU cu ta un cu menos ta contribui

na bienestar general

Otmar Oduber, Parlamentario di AVP durante conferencia extraordinario di e partido ayera mainta, a comenta cu Promer Minister Nel Oduber ta bin papia cu e mercado Europeo mester bai wordo explora, cu mester inverti eyden, pasobra Euro ta fuerte y nos tin un gran posibilidad di crece. Segun Otmar Oduber, AVP tin 4 aña ta vociferando esaki, den tur tratamento di presupuesto ta atende cu e minister di Turismo riba e asunto aki, pero lamentablemente e no ta haya oido.

Mas aleu el a indica cu den presupuesto di 2008 tin un suma di 3.8 miyon florin pa mercadeo na Europa. 7 aña pasa e presupuesto pa Europa tabata 3 miyon florin, es decir den casi 7 aña a aumenta e presupuesto cu solamente 800 mil florin. Si tuma e cambio di Euro na e momentonan aki e presupuesto pa mercadea Aruba na Europa ta menos cu nos tabata inverti mas cu 10 aña pasa na Europa, invirtiendo solamente 1.3 miyon Euro.

Un otro punto cu Parlamentario di AVP a menciona riba declaracionnan di Promer Minister ta cu el a bisa cu nos mester di mas hotel manera RIU na Aruba, pasobra e hotel tin 90% di ocupacion mientras cu e otro hotelnan ta coriendo abou na Aruba. Esaki pa Otmar ta mustra cu sea nos Promer Minister no ta biba den realidad of e kier tuma e pueblo aki haci. “RIU Hotel ta un di e hotelnan cu menos ta contribui na bienestar general di e pais aki, cu menos ta contribui na e nivel y calidad di bida cu nos kier pa nos hendenan biba den dje pa motibo cu e ta un all inclusive. Pracitcamente e e turista cu bin ta keda den e resort aki, no ta gasta placa pafor y mayoria di placa ta bai den exterior”.

Segun miembro di AVP, esaki no kiermen cu nan ta papia malo di RIU, pero ora un pais ta depende 70% di turismo, esey kiermen cu no ta solamente hotel mester sa di gana, pero mester percura pa bienestar yega na comunidad. “No ta pasobra cu nos Promer Ministro a logra haya un tent den RIU pa un spa pa su famia, anto e ora ey bo kier pa e pais aki tin 10 RIU mas pa di e forma ey bo haya 10 spa”.

Den declaracion final di Promer Minister el a felicita cu a logra e vuelo di Copa Airlines pa Aruba. Otmar Oduber tambe a felicita Aruba pa e vuelo di Copa Airlines, pero tambe a recorda cu mas cu 2 aña pasa e mes a mustra riba e hecho cu for di 2 aña y mei pasa, Copa tabatin Aruba den e top 5 destinations pa cuminsa bula. Si Minister Briesen no tabata bezig ta partiendo flyers na tradeshownan den e booth di Aruba y mas bien tabata atende cu ehecutivo di aerolineanan, nos por tabatin Copa Airlines 2 aña pasa caba.