John van der Biezen:

Mirando e ultimo desaroyonan pa loke ta trata e costo di bida, nos por mira y sinti e keho y frustracion di un pueblo. Nos por mira un pueblo traciona door di gobernantenan cu a pone e amor pa e placa na prome lugar cu e amor pa un pueblo. Durante e ultimo 7 anja nan di gobernacion di Gabinete Oduber 3 y 4 e pueblo di Aruba a wordo sacudi pa un ola di medidanan cu te ainda ta increibel pa kere. Ademas a wordo introdusi e cruel BBO cu a wordo propaganda miyonariamente cu placa di pueblo den medionan di comunicacion.y cu a resulta den e frustracion y dolor pa hopi hogarnan na Aruba.

Director di Centraal Bureau Statistiek recientemente a reconfirma e aumento di inflacion te na 10%. Durante e ultimo 7 anjanan aki a ser abusa grandemente cu placa di pueblo pa asina regla acuerdonan y contractnan miyonario pa esnan serca di e partido MEP usando pa hopi tempo largo e escusa cu gobierno anterior lo tabata e causante di e crisis finaciero di Aruba y cu ta pa esey mester a tuma medidanan.

Hopi hende a kere den e argumentonan falsonan aki, pero mientras cu e tempo tabata pasando, pruebanan a sali na cla di e berdadero proposito di partido MEP, cu a pidi mandato claro pa goberna. E berdaero proposito tabata pa regla sumanan miyonario pa contractnan, huurmento di edificionan pa familiarnan di algun minister y parlamentarionan di partido MEP. E placa a wordo recauda for di sodor di e pueblo di Aruba pa medio di medidanan y e famoso y cruel BBO.

Ta fresco den nos memoria e brug di alrededor di 600 mil florin cu a wordo construi den e districto di Noord cu placa di pueblo pa un proyecto di indole familiar di un minister. Mientras cu pueblo di Aruba ta sufriendo bou di un costo di bida haltisimo, e brug a wordo construi, contractnan lucrativo a sigui y ta sigui wordo sera cu familiarnan di gobernantenan cu placa genera di e medidanan. Mayoornan hopi biaha ta haya nan ta traha 2 trabouw of mamanan soltero cu ta traha 2 trabouw pa por sobrevivi e costo di bida halto. Otro factor frustrante ta e detereoro di salud pa motibo di e desgaste na un forma rapido di e curpa pa motibo di trahamento di oranan largo y pa hopi dianan largo.

Un di e frustracionan di mas grandi ta e escases di cuminda den hogarnan pa motibo di e costo di bida halto grandemente causa door di e BBO. Despues di casi 7 anja den gobernacion, prome minister di Aruba, cu a wordo adverti na varios ocacion door di e fraccion di partido AVP den Staten, tocante e aumento di e prijsnan di awa y corriente pa motibo di e prijs di e fuel oil y despues di nega di duna oido na e advertencianan aki, recientemente Prome Minister mester a viaha pa Colombia den un forma relampago pa trata di busca gas como alternativa. E intento no solamente a costa pueblo placa atrobe, sino cu e tabata envano, mirando cu e reservanan di gas na Colombia den poco anjanan lo termina. Ademas e gobierno di Colombia a afirma cu lo no duna prijsnan preferencial na otro paisnan. Pueblo por observa un biaha mas e forma di goberna di Gabinete Oduber 4 cu no ta refleha ningun tipo di vishon.

Partido AVP a presenta un presupuesto alternativo den Parlamento pa asina alivia e situacion alarmante den hopi hogarnan. Pa combati e detereoro social partido AVP a aloca 8 miyon florin pa combati e pobresa cresiente. Sumanan a wordo aloca pa hisa e bijstand cu 50% y tambe partido AVP a introdusi un toeslag di 100 florin extra pa luna pa cada mucha cu ta bay school te na e edad di 18 anja. E presupuesto a wordo rechasa door di fraccion di MEP den Parlamento.