Parlamentario Alexander Tromp, fraccion AVP

Parlamentario pa fraccion di AVP, Alexander Tromp ta hanja cu mientras cu Gobierno ta apunta e situacion mundial di petroleo como consequentia pa ku e creciente inflacion na mas di 10.2%, otro paisnan competidor di Aruba manera Merca y Corsow a conoce solamente un crecimiento te ku 5%. Gobierno no kier accepta cu ta door di e introduccion di BBO na januari 2007 a afecta e inflacion creciente nunca bisto y consequentemente un desaster pa locual ta concerni e poder di compra di nos pueblo cu a bay drasticamente atras mes. Si tawata door di e situacion mundial manera cu Gobierno ta insinua anto dikon anto Corsow of Merca no tin e mes un inflacion manera cu Aruba ta experenciando? Gobierno mester stop di enganja nos pueblo y bisa e berdad cu ta door di falta di corahe pa tuma desicionnan na bienestar di Aruba e situacion ta manera e ta actualmente! Si a pone orgullo partidista un banda y accepta e presupuesto alternativo cu fraccion di AVP a entrega durante e comienso di e tratamiento di e presupuestonan anja pasa, anto sigur lo e situacion actual lo tawata hopi diferente mes.

Parlamentario Tromp ta sigui elabora cu den dicho presupuesto alternativo tawata stipula primordialmente na elimina e BBO den un fase di 2 anja. E promer anja lo a elimina BBO riba tur productonan di primera nesecidad manera lechi, pan, suku, harinja etc. y su siguiente anja riba tur e otro productonan. Esaki sigur sigur lo a trese un alivio pa nos pueblo principalmente esnan mas vulnerabel den nos comunidad manera nos penshunadonan, esnan cu ta cobra un sueldo minimo etc. Mas cu claro pa por logra esaki mester corta den gastonan irresponsabel hasi cu ta simplemente pa juda esan serka di Gobierno, entre otro door di huurmento di edificionan, contractnan lucrativo manera entre otro consultancynan, pagamento na abogadonan etc.

Di otro banda mester bay baha gastonan di departamentonan y aloca esakinan na unda cu tin prioridadnan, manera na promocion di nos Turismo, infrastructura, schoolnan etc. Ta danki na e BBO cu nos tin e inflacion di 10.2% y tambe danki na e BBO cu e poder di compra di nos pueblo a bay mas atras drasticamente mirando e hecho cu productonan nan prijs a bira casi 3X mas caro compara promer cu e introduccion di e BBO.

E parlamentario ta termina bisando cu ta un compromiso di partido AVP pa cu nos pueblo cu asina pueblo duna partido AVP e confiansa bek, un di e promer desicionnan sigur lo ta di bay elimina e BBO, manera cu ya fraccion di AVP a sugeri den e presupuesto alternativo entrega anja pasa y asina trese alivio bek den e poder di compra di nos pueblo.