John van der Biezen:

Recientemente pueblo di Aruba por a tuma nota den medionan di comunicacion, e argumentonan di Minister di Husticia pa trata na hustifica un proyecto di sleeping police. E sleeping police tabata hopi den noticia ultimamente. Ariba su mes, un proyecto pa pone sleeping police no ta un mal idea, pero e meta tras di e ponemento di nan ta di lamenta.

Mientras cu Gabinete Oduber 3 y 4 ta asota e pueblo di Aruba cu tur sorto di medidanan y BBO nos por tuma nota claramente cual ta e destinacion di e placa recauda di e medidanan aki. Despues di escandalo tras di escandalo di gabinete Oduber 3 y 4, nos ta tuma nota cu awor tabata un biaha mas e turno di Minister di Husticia. Bouw di e capa di tresemento di seguridad pa trafico, Minister di Husticia a asigna un familiar sercano di dje pa ponemento di e famoso sleeping police.

Un proyecto cu a costa e pueblo pagador di belasting un biaha mas un cantidad di placa. Aproximadamente 200 mil florin tabata e costo dicho proyecto, cu a ser otrorga sin destaho publico. Un proyecto cu no tabata dipone di e consehonan y aprobacion necesario pa ser ehecuta. Mirando cu esaki tabata un obstaculo, e Minister en cuestion, a dicidi cu aprobacion di Prome Minister di Aruba, implementa e proyecto cu a ser otorga na un familiar di Minister di Husticia, aunque cu e proyecto tabata illegal. Nos por sigui constata e stempel di Gabinete Oduber 3 y 4, cual ta, asota un pueblo cu medidanan pa regala campnjadornan y familiarnan sercano di Ministernan proyecto nan miyonario, contractnan lucrativo.

Recientemente e sleeping policenan cu a ser poni na un forma illegal ariba ordo di e propio Minister di Husticia, awor ta ser kita ariba ordo di Minister Marisol Lopez Tromp kende algu lunanan atras a autorisa construccion di un brug cu a costa pueblo pagador di belasting un suma alrededor di 600 mil florin, pa asina conecta e caminda grandi pa e proyecto familiar di dicho Minister. Nos por observa escandalo tras di escandalo den Gabinete Oduber 4. Awor cu gran parti di e sleeping policenan a ser kita, ken lo para responsabel pa e placa gasta den e proyecto illegal aki? Acaso Minister di Husticia ta bai entama un caso contra di Minister di Infrastructura y asina duna su ruman abogado, Hendrik Croes, un otro oportunidad di enriquese su mes un biaha mas cu placa di e pueblo pagador di belasting?

Ta fresco den nos memoria e caso di e lider di e fraccion di MEP den Parlamento, Sr Ady Thijsen contra Minister di Infrastructura, Sra Marisol Lopez Tromp encuanto e famoso tereno di Sr Thijsen. Nos por mira claramente con placa ta corrumpi y con e amor pa placa ta condusi na practicanan inhustu. Esakinan sigur ta mal ehempelnan pa nos comunidad y sigur pa e hobenan cu ta observa e detereoro di norma y balor. Partido AVP den pasado a zorg pa e mehoracion di condicion di bida di esnan mas vulnerabel den nos comunidad y sigur e redoblacion di pensioen pa nos grandinan. Partido AVP un biaha mas ta para cla dilanti di un reto grandi pa rescata nos pais Aruba.