John van der Biezen:

E pueblo di Aruba ta sigui experimenta momentonan amargo na man di Gabinete Oduber 4. Recientemente nos por a observa un proyecto nobo cu yama sleeping police. Ariba su mes e idea no ta malo, pero e forma con e placa ta ser recauda pa paga e persona pa pone esakinan ta cuestionabel. No ta un secreto cu e ruman homber di minister di Husticia ta gosando di sumanan grandi di placa recauda di e medidanan imponi ariba e pueblo di Aruba durante e ultimo 7 anjanan. E sumanan di huurmento di edificio a crese na miyones pa un solo persona. Esakinan ta sin conta e casonan cu e abogado, ruman di minister di Husticia, ta haya for di Gabinete Oduber 4 pa traha ariba nan.

Awor atrobe nos por mira con placa prosedente for di e medidanan tuma inhustamente contra e pueblo di Aruba, a bai pa un familiar sercano di un minister pa pone e sleeping plice nan aki. Placa procedente di e medidanan tuma, a bai tambe pa entre otro construccion di e famoso brug cu ta condusi na e tereno cu un cas perteneciente na un familiar sercano di e minister di infrastructura, Sra. Marisol Lopez Tromp. Sumanan grandi di placa ta bai directamente den saco di familiarnan di gobernantenan, mientras e pueblo di Aruba ta sclama pa auxilio.

Reciente a ser anuncia e medida di cobramento pa parker auto den e parkeerplaats di hospital. Pueblo di Aruba ta consiente cu e cartera di Salubridad Publico ta cay bouw di maneho di Minister Ambrosio Candelario (Booshi) Wever y cu esaki ta inclui Dr. Horacio Oduber Hospitaal, tambe e kitamento di remedinan for di e positieve lijst. Den medionan di comunicacion a ser transmiti e noticia di cobramento pa parkeermento na hospitaal y cu esaki ta igual na algun pais. Pero e crudo realidad ta cu ta otro medida di gobierno cu ta ser introdusi ariba e pueblo di Aruba.

Pueblo di Aruba no tin espacio pa sigui carga mas medida. Cu e medida nobo aki, pueblo di Aruba kisas lo mira pronto un otro proyecto familiar di un minister cu mester ser cubri cu placa di pueblo. Costo di bida ta sigui subi pa motibo di e efecto multiplificador di e BBO cu ta hasi e prijsnan na Aruba exorbitantemente halto, lagando hopi presupuesto familiar den un estado critico. Hopi famianan na Aruba ta desespera cu e rumbo con pais Aruba ta bayendo den man di Gabinete Oduber 4, caminda riconan ta sigui bira mas rico y caminda cu esnan cu ta cobra pensioen y esnan cu ta cobra un salario minimo ta biba den un tension halto con pa sobrevivi e costo di bida halto.

Den su presupuesto alternativo partido AVP a trese solocionan concreto y realisabel pa alivia e situacion deprimente cu hopi hogarnan aki na Aruba ta pasando aden, pero un biaha mas e propuestanan aki a wordo rechasa door di e fraccion di MEP den Parlamento.