Den un carta personal dirigi na Promer Minister

Mike Eman ta accentua valor di amor y guia di mama

	Lesa carta

Lider di AVP, mr. Mike Eman a dirigi un mensahe personal na Promer Minister Nel Oduber cu fayecimento di su mama Sra. Carmen Felepina Oduber. Den e mensahe aki mr. Mike Eman ta bisa: “Ta cu sentimiento di profundo convivencia cultiva pa mi propio mama cu tur dia ta cumi den mi memoria mi kier desea Bo y Bo famia hopi forza y consuelo cu fayecimento di Boso mama, Sra. Carmen Felepina Oduber. E bashi profundo cu e fayecimento di un mama ta laga atras ta e muestra final di e forma con e a stima nos y a sacrifica pa su jiunan.

Nos mamanan tin un lugar special den nos curason. Nos mamanan ta duna nos e forza pa enfrenta e retonan di bida y e amor cu ta sostene y caricia nos. Un mama ta nos promer maestro di bida. Cu ta duna nos e conocemento y e guia pa haci e escohencianan corecto y sirbi causanan mas grandi cu nos mes pa bienestar di nos prohuimo y pais.

Sin duda cu un mama cu tanto jiu cu fayecimento di un tata na edad hoben a haci e trabo y e reto aki mas duro. Sra. Felepina Oduber a conoce e trajectoria duro y dificil aki, pero a cargue manera un mama ehemplar. E bon memorianan aki di tanto stimacion y atencion ta duna un consuelo importante. Mi ta sigur cu Boso tambe por haya den esaki forza y fe pa juda supera e momentonan dificil aki.

Ta den nos curason ta warda e aprecio y stimacion cu pa semper nos ta keda pa locual nos mama ta nifica pa nos. Cu e sentimientonan profundo aki di convivencia mi kier expresa den nomber di AVP na Boso famia condolencia y forza cu e perdida di Boso mama stima Sra. Felepina Oduber. Cu nos Creador dune un lugar special den su Reino”. Sinceramente, mr. M.G. (Mike) Eman, Lider di AVP.