Rene Herdé di Plataforma di Ensenansa di AVP

E siman aki scolnan ta habri pa un aña nobo. Tanto alumnonan, maestronan di scol y majornan ta sinti un entusiasmo. Un entusiasmo cu ta bin di e pensamento cu un aña di scol nobo ta representa speransa nobo, oportunidad nobo y e posibilidad di haci esfuersonan nobo pa logra e meta basico di enseñansa: siña pa bai dilanti den scol, siña pa haya un profesion, siña pa biba un miho bida, siña pa contribui na nos comunidad.

E speransa aki ta den enseñansa so Bo ta haye. Pasobra no tin otro actividad di bida, no tin otro organisacion den nos comunidad cu ta haci loke enseñansa ta haci. Y ta esaki ta haci enseñansa asina importante pa tur hende y pa tur parti di nos comunidad.

E importancia di enseñansa aki ta pone un responsabilidad grandi riba esnan cu ta encarga cu tumamento di desicion, duna direccion, organisacion, guia di enseñansa y dunamento di les. Y ora, manera den nos pais, un parti grandi di e dunamento di direccion, di e tumamento di desicion, henter e financiamento y un parti grandi di e organisacion di enseñansa, ta den man di gobierno, e responsabilidad di gobierno ta bira mas grandi. Henter enseñansa na Aruba ta depende di loke gobierno haci y keda sin haci. Ta pesey, apesar di e entusiasmo y speransa cu Bo ta sinti e dianan aki, ta lastima pa constata cu gobierno no a haci nada pa fortifica e entusiasmo y speransa aki.

Cu excepcion di e scol nobo na Kudawecha, no tin desicionnan pa mehora loke nos a siña didje di añanan cu a pasa. No tin iniciativanan di minister di enseñansa pa cambia loke a bai malo aña pasa. E experiencia a keda den mente di alumnonan, majornan y maestronan, pero ningun accion di banda di minister di enseñansa pa asumi su responsabilidad. Nada, nada, nada! Ta keda awor na directivanan, directornan y maestronan di scol; na majornan y nan jiunan pa logra nan metanan riba nan mes, pasobra di gobierno no por spera nada!

E FIESTA NA KUDAWECHA

Awor tur esaki ta sona masha negativo na comienso di aña di scol. Lamentabelmente (!!) e ta berdad. Mare nos por a menciona un serie di desicion cu a tuma pa atende problemanan serio cu tin den nos scolnan. Mare nos por a menciona cu no ta na Kudawecha so ta habri un scol nobo, pasobra e cantidad di muchanan cu tin den klasnan di scolnan basico ta sclama pa mas scol!!! Esaki ta otro promesa di minister di enseñansa cu a keda na palabra so! Ela bisa cu un di su metanan ta pa baha e cantidad di alumno den un clas pa e maestro por duna mas atencion na cada alumno, pero ta te eynan ela keda.

Enbez di e cantidad di alumno pa clas baha, ela subi. Y no ta siman pasa e muchanan a aparece. Un bon planificacion por a anticipa esaki añanan pasa. Tabata tin suficiente tempo y placa pa a traha mas scol. Pero e tempo y e placa a bai pa otro cosnan cu e minister aki y e gobierno aki ta haya mas importante cu enseñansa. Nos ta masha contento cu e scol nobo na Kudawecha y tur e facilidadnan y servicionan cu e scol aki lo tin pa e maestro y alumnonan. Pero nos no a tende e minister anuncia cu tur scol na Aruba lo bai haya e facilidad y servicionan aki. Ohala cu ora di e fiesta na Kudawecha pa apertura di e scol (y di e campaña di e minister), e anuncia cu tur scol di Aruba lo haya tur e facilidadnan di scol basico publico na Kudawecha!!! (Y hacie tambe!!!)

E FRUSTRACION DI OTRO GENERACION

E falta di atencion pa problemanan den enseñansa, e falta di tuma desicion, e falta di pone fondonan disponibel, e falta di iniciativa pa mehora enseñansa ta loke nos a wak di e gobierno actual. Un ignorancia continuo y persistente cu a haci cu den hopi sector di enseñansa, specialmente den enseñansa basico, mehoracion necesario a keda para. Promesanan haci manera pa renoba enseñansa a disparece cu eliminacion di PRIEPEB, e grupo di esperto y maestronan, cu tabata encarga cu renobacion structural di enseñansa basico. Promesanan manera cuminda saludabel pa alumnonan na nos scolnan a keda na un di e famoso comunicadonan di prensa di e minister, pero ningun accion of iniciativa. Ta scolnan mes a busca solucion, completamente independiente di gobierno y cu ayudo di trahadornan den otro sector. E promesa di clasnan mas chikito, lubida. E promesa di renobacion di henter nos enseñansa a aña 2017 a keda na un plan cu a costa hopi placa, pero sin iniciativa concreto. E necesidad pa baha e gastonan pa majornan cu tin cu cumpra paña, buki y otro materialnan pa nan jiunan, no a haya oido di e minister. E reclamo di minister presidente cu ‘keda sinta ta costa placa’ a bin ora esaki a toca un miembro di su partido MEP. E cantidad di alumno den enseñansa secundario cu no a haya scol den dia, tampoco no a haya oido di e minister. E ignorancia di e minister pa asuntonan di enseñansa, ta kita e oportunidadnan di hopi alumno pa desaroya nan capacidadnan real; e ta kita e entusiasmo cu nos kier pa maestronan tin riba e prome te cu e ultimo dia di scol; e ta debilita seriamente e posibilidad di desaroya nos isla. E falta di atencion y iniciativa di e minister di enseñansa actual ta frustra atrobe un generacion di hoben!