Segun Parlamentario Otmar Oduber:

RIBA COSTO DI BIDA DI NOS HENDENAN

Parlamentario Otmar Oduber a comenta riba e utimo boletin mensual di Banco Central y e ultimo indice di prijs di consumo di CBS. E cifranan ta alarmente y pesey Oduber a dicidi di analiza e situacion cu tin den nos comunidad pasobra hopi bes ta mira cu gobierno den su ultimo intentonan ta purba tira culpa riba comercio pa cu aumentonan drastico di prijs.

Rapport di Banco Central ta bisa riba e parti di inflacion cu na juni 2008 e indice di prijs di consumo a aumenta cu 8.4% compara cu e luna corespondiente na 2007. E average di inflacion di 12 luna a acelera na 7.8% compara cu e 4.0% na juni 2007. Segun Parlamentario di AVP e aña cu a introduci BBO esaki tabata 4% y e aña aki a aumenta te na 7.8%.

Mas aleu e rapport ta sigui bisa cu e comparacion cu Merca cu ta nos mercado principal a aumenta te na 4.1 punto di porcentage for di 1.4 punto di porcentage na juni 2007.

Ora exclui e componentenan relata na energia (awa, coriente y gasolin) e tasa di inflacion di 12 luna ta aumenta for di 1.2% te na 4.8% na juni 2008. Esaki kiermen cu e influencia di awa, coriente y gasolin tin un influencia di 3% riba nos inflacion y e 4.8%, si cohe hancho ta refleha e BBO. Pa loke ta e cifranan di CBS pa juli 2008, Otmar Oduber ta menciona cu e average pa e ultimo 12 lunanan ta yega 10.20%, es decir awor cu nos ta na mitad di aña nos ta na e mesun nivel cu nos tabata na december 2007.

Riba e punto si BBO tin influencia of no riba esaki, Parlamentario di AVP a duna un ehempel. Si na supermercado un persona tabata cumpra na juni 2007 un producto cu ta costa 100 florin, awe e ta costa 7.80 mas (tumando luna di juni cu tabata menos malo cu esun di juli), es decir e la bira 107,80, si pone e 3% di BBO di wholesaler cu ta 3,20 di dje, e producto ta bira 111 florin. Ademas si pone e 3% di BBO di e supermercado cu ta 3,30 e producto ta bira 114,30 florin. Despues ta bin e 3% di e consumidor cu ta 3,45 y asina e prijs final di e producto ta bira 117,75 florin. Es decir den 12 luna e producto aki a subi for di 100 florin te na 117,75 florin, un aumento di 17,75 florin. Si considera cu BBO no tabata aden, e mesun 100 florin aki y a base di e mesun 7.8% cu e propio Banco Central ta bisa cu apenas 3% a resta sacando awa, coriente y gasolin, e ora ta papia di un aumento di 4.2% solamente aña pasa, e lo a costa awe 104,20 florin.

Ehempel di paña ta peor ainda, pasobra na momento cu gobierno a aplica e cambio di ley pa bai pa e sistema harmoniza, esaki a aumenta di 6% pa 12% den un cantidad di variacion. Es decir, si mira e efecto di BBO riba esaki, e efecto riba compra di paña ta bira mas drastico ainda.

Pesey Otmar Oduber ta bisa cu ta momento pa para keto y bisa cu BBO simplemente ta horcando e pueblo aki y e ta wordo demostra cu cifranan. Loke ta spera pa fin di aña aki ta cu lo termina un average di inflacion cu lo surpasa 12 pa 13% y esaki ta efecto di BBO.