Cifranan ta mustra cu poder di compra di nos hendenan

MARLON Y MEP TA PREOCUPA PA PLACA PA GOBIERNO

Reaccion di Marlon Werleman riba e declaracionnan di Otmar Oduber pa loke ta trata BBO y loke esaki ta trese den caha di gobierno a demostra con e miembro di partido di MEP kier tira santo den wowo di pueblo, caminda el a purba gaña nos hendenan cu di e 700 florin promedio cu ta wordo gasta pa luna na supermercado solamente 21 florin ta bai pa caha di gobierno. Esaki en principio ta e caso si no tene na cuenta tur e otro schakkelnan anterior promer cu e consumidor final paga e suma aki, pero loke Otmar Oduber a presenta no ta cuanto ta bay den caha di gobierno sino con hopi e poder di compra di nos hendenan a bai atras den apenas 1 aña y esaki danki na BBO.

E 700 florin cu Marlon Werleman mes a usa, no ta bal mes hopi cu e 700 florin di juni aña pasa, y esaki pueblo ta sinti tambe. Na juni 2008 danki na e inflacion cu a bin como consecuencia principalmente di e BBO, e 700 florin cu un persona tabata gasta pa luna na un supermercado a bira nada menos cu Afl. 824,55.

Es decir, e poder di compra di nos hendenan a bai atras cu mas cu 124 florin den apenas un aña ora bai haci compras na supermercado. Otmar Oduber splicando mas di esaki, a mustra cu inflacion na juni 2008 tabata 7.8%. Esaki ta haci cu e 700 florin ta bira 754,60. Si pone riba esaki e 3% di BBO cu e wholesaler ta cobra, e ta sigui subi y yega te na 777,25 florin. Despues mester agrega e 3% di e supermercado y esaki ta yega te na 800,55 florin y finalmente e 3% cu e consumidor mester paga ta pone cu e suma ta yega te na 824,55 florin.

Kico esaki kiermen? Si aña pasa cu 700 florin un persona por a yena un garoshi di supermercado, awe, cu e mesun placa aki porta por yena e garoshi aki te na mitad y cu suerte un tiki mas. Esaki ta encera cu nos hendenan no por yega mas na e mesun cantidad di productonan cu aña pasa nan por a cumpra, e nivel di bida di nos hendenan a bai dramaticamente atras den un periodo di tempo asina cortico.

Si gobierno di MEP lo a scucha tur instancia, partido, expertonan, etc pa no introduci BBO, awendia e inflacion di Aruba lo tabata apenas un 4.2%. Si tuma atrobe e mesun 700 florin di aña pasa, esaki awendia lo costa 729,40. Poder di compra di nos hendenan, den e ehempel aki, lo a bai solamente cu 29 florin atras y no cu casi 130 florin manera ta e caso awor cu BBO a worde introduci, y indicacionnan ta cu esaki lo ta empeorando den e siguiente lunanan.

Esey ta e diferencia grandi cu tin entre Otmar Oduber y Marlon Werleman, mientras cu AVP ta preocupa pa nos hendenan, con nan a bin ta e victima di e maneho desastroso di Gabinete Oduber cu a encarga su mes di enriquece famia y amigonan; di otro banda e politico di MEP ta preocupa pa cuanto placa ta bai den caha di gobierno y asina por gasta mas cu Friends & Family.