Parlamentario Alexander Tromp, fraccion AVP

POR A WORDO DESTINA PA JUDA ALGUN DI E MAYORNAN

CU NO POR PAGA SCHOOLGELD PA NAN JIUNAN!

Parlamentario pa fraccion di AVP, sr. Alexander Tromp ta hanja cu hopi ta e comentarionan negativo cu ta circulando keto bay den nos comunidad entorno e asunto di e “polisnan drumi”! Por a scucha minister di Husticia siman pasa na un radio emisora local defende e proyecto o con bo kier llame fervientemente! Ora a puntre dikon esaki a tuma lugar sin a bay un destaho publico e la contesta cu esaki ta debi na e hecho cu e gasto entorno “e proyecto” aki lo no a costa mucho. Cu pa bay un destaho publico mester tin di haber cu cierto sumanan bay ariba. Parlamentario Tromp ta puntra minister di Husticia pakiko anto no ta divulga e suma o gasto exacto cu su proyecto aki a costa nos pueblo!

Parlamentario Tromp ta sigui enfatisa cu tur e sucedido entorno e proyecto aki tawata un payasada completo diparti di minister di Husticia y minister president, mirando e hecho cu asina “the boss” herself a tuma rienda di su ministerio despues di un vacacion, a duna opdracht pa laga kita e polisnan drumi for di diferente careteranan di nos isla! Esaki sin mas ta un bofta den direccion di e minister president cu tambe a firma e decreto pa laga pone e polisnan drumi, den su function como reemplasante di minister drs. Lopez-Tromp.

Parlamentario Tromp ta puntra su mes anto ta pakiko anto bo ta eherciendo e funcion di reemplasante ora di ausencia di sra. Minister Lopez-Tromp, pa despues ora e bin bek hala e desicionnan cu bo a tuma como reemplasante un banda? Aki claramente pueblo por mira con e Gobierno aki ta gobernando nos pais! Ministernan ta tuma un desicion pa despues otro bin barie for di mesa!! Pero for di tur e payasadanan aki esun cu ta wordo perhudica ta nos pueblo debi cu ta cu placa di pueblo tur e payasadanan aki mester wordo paga! Placa cu por a wordo destina pa por ejempel na mayornan cu no por alcanca na paga schoolgeld, uniforms, boekinan etc. pa nan juinan cu tin di bay school.

Parlamentario Tromp ta termina bisando cu e Gobierno aki a perde cuero di cara y ta sigui cu e deroche y malgastamento di fondonan publico simplemente pa complace esnan serka di nan, esta e friends and familiesnan, mientras nos pueblo eyfo ta pasando den duro y hasta no por cumpli cu nan obligacionnan financiero. E proyecto di e sleeping polisnan ta un di e tantisimo ehempelnan di e deroche y malgastamento di fondonan publico !