Mike de Meza, Parlamentario AVP

Mester rechaza e maneho gubernamental di apartheid

ora ta toca un desaroyo pa pariba di brug

Mike de Meza, Parlamentario di AVP ta considera remarcabel cu e gobernantenan actual enberdad a lubida riba e parti pariba di nos isla. No ta un boycot: ta un rato so a lubida (“un rato di solamente 7 aña”)cu tin un San Nicolas y vecindario cu tambe tin necisidadnan.

Keto bai tin asina hopi negligencia pa cu e parti pariba di nos isla cu ta pone hende pensa si e gobierno actual tin un rabia of algo parecido pa cu San Nicolas y vecindario. Ora tira un bista riba e facilidad deportivo pariba di nos isla cu ta den un estado asina deplorabel. Ora mira awe cuanto problema social tin den nos pais y con tiki durante e ultimo 7 añanan a wordo haci dor e gobernantenan actual, ta cos di yora, de Meza ta comenta.

Hasta deporte, caminda tur hende sa cu deporte ta un gran aporte pa por tin lidernan pa mañan, a wordo totalmente neglisha dor di e gobernantenan actual pa cu e parti pariba di nos isla. Ora mira e aumento den criminalidad, uso di alcohol, uso di droga y embarazo hubenil bou nos hobenan, tur hende ta puntra ta dicon un parti significante di nos muchanan ta scohe pa e direccion aki? Tambe por tuma nota cu tur rond di mundo paisnan grandi y chiquito ta lucha pa contraresta e sintomanan di drogadiccion, criminalidad y embarazo hubenil cu mihor programanan di deporte y educacion, mihor hermentnan y mihor facilidadnan pa educacion y deporte. Pero na Aruba ta como si fuera cu e gobernantenan no ta interesa of concerni cu e ultimo datonan demografico negativo creciente di nos hobennan.

Tuma un rato y cana of core rond na San Nicolas y vecindario anto bo lo mira con ta para cu Joe Laveist Sport park, canchanan di basketball, voetbal y baseball ta. Esaki ta e situacion den diferente barionan pariba di nos isla.

Mike de Meza ta expresa cu e criticanan pa cu gobierno di MEP no ta bin for di “no where”, esakinan ta hechonan cu tambe ta wordo confirma dor tur hende cu ta bishita nos lugarnan pariba. “Bo por imaginabo cu e edificio di biblioteca nacional na San Nicolas, e unico biblioteca pa full e parti pariba di nos isla, te dia di awe ta sera! Aña pasa e edificio a sera den temporada di scol, vacacion grandi di scol a bin y vacacion grandi di scol a bai, aña nobo di scol a cuminsa y aña di scol caba, vacacion di scol a cuminsa y vacacion di scol a bolbe caba y awor atrobe aña nobo di scol ta cuminsa y AINDA e edificio di biblioteca nacional na San Nicolas ta SERA! Esaki ta bisto cu San Nicolas y vecindario ta hopi pero hopi abou riba e lista di prioridad di e gobernantenan actual. Ban spera cu a corto plazo e usuarionan di e biblioteca nacional di San Nicloas por haci usa di e edificio, cu a wordo traha pa su destinacion specifico, lo ta usabel atrobe!”, Mike de Meza ta expresa.

E ta sigui comenta cu ora mira con e edificio di exDOOV, exDINA, DIMAS na San Nicolas ta para bira, ta cos di yora. Ora tira bista riba e edificio di e ex-watertoren na San Nicolas, ta otro cos di yora! Asina tin mucho mas, no mester papia mes di e servicionan cu gobierno ta brinda na nos ciudadanonan di e parti aki di pariba di nos isla. Bishita hulpbestuurkantoor pa cada ken por mira y sinti pa nan mes kico pueblo di pariba ta pasa aden.

Awe ta tende Prome Minister anuncia cu no lo ehecuta proyecto di desaroyo turistico na Seroe Colorado, esaki despues cu durante campaña politico na 2001 y 2005 a priminti cu lo trese desaroyo grandi pa San Nicolas.

Finalizando Mike de Meza ta expresa cu e trato cu San Nicolas y vecindario ta haya ta inaceptabel. Gobierno tin cu percura pa e maneho integral y total di un pais completo.