Mike de Meza, Parlamentario AVP

Mike de Meza, Parlamentario di AVP ta haya locual ta pasa cu San Nicolas y vecendario hopi remarcabel! Tur hende por corda con hopi partido politico, gruponan ambientalista, oportunista politiconan y hasta algun comerciante cu no tin ningun interes na San Nicolas a boycotea y protesta contra e proyecto di race track y hotel na Seroe Colorado na aña 1999 y 2000.

A bisa cu e medio ambiente na Seroe Colorado (pa nort y pariba di Seroe Colebra, exLago hospital) lo daña. Lo core cu shoco y lagadishi tambe a wordo bisa. Wel awe te ainda ta clip cu calichi so tin riba e localidad ariba menciona. Gran parti di e shoco y lagadishi a wordo comi dor di boa y ningun momento a mira ningun di e personanan cu e tempo a protesta y boycotea e proyecto.

Mas aleu de Meza ta comenta cu algun parlamentarionan di MEP na 1997 pa 2001 cu awe ta ministernan tambe a boycotea e proyecto y te hasta a argumenta fuertemente cu Aruba ya a yega su capacidad di carga y no mester ningun desaroyo mas. Wel locual ta remarcabel cu for di 2001 ora cu e gobierno di MEP a tuma e maneho pa gobernacion por a mira un aumento di proyectonan duna cu a aumenta e capacidad cu Aruba mester carga sin cu tin un beneficio extra pa pueblo di Aruba. Aruba den e añanan benidero mester bai importa mas cu 10 mil hende extra pa cumpli cu e proyectonan duna dor di Gabinete Oduber III y IV. Unda e argumento di capacidad di carga a keda cu hasta gremionan social y comercial tabata usa! Tambe si por ehempel bai wak cuanto naturalesa a wordo kita/rosa for di banda di Eagle y banda di Palm Beach anto cada persona obhetivo of cu realmente sa di medio ambiente lo keda babuca! Unda tur e medio ambientalistanan a keda? Sorry, berdad ta cu un gran cantidad awe a haya trabou cu gobierno actual of ta puramente simpatisantenan di MEP cu awe mester sera boca paso ta un oportunidad propio so ta conta.

Nada cu San Nicolas haya ta bon pa e grupo di personan aki, e ta hasta parse cu na Aruba tin Apartheid ora ta toca algo pa San Nicolas of un desaroyo specifico. Esnan cu no sa mester core rond y papia cu e pueblo di pariba di nos isla pa nan por haya un bista di e apartheid gubernamental cu ta existi. Wak con ta trata cu e servicionan cu gobierno mester duna na San Nicolas y vecindario. Wak nos facilidadnan deportivo y nan estadonan y kico gobierno actual a haci of inverti. Wak con nos comercio ta sufri y ta roga e gobierno actual pa un ayudo of un empuhe. Wak e cayanan y e luznan den barionan. Wak nos beachnan cu a wordo neglisha pa gobierno.

“Un cos ta sigur cu e pueblo di pariba di burg tur dia ta laga nos sa cu e mentalidad ta cambiando y cu e pueblo di pariba no lo acepta engaño mas y lo ta firme den su decision pa un cambio for di e gobierno actual. Hunto lo nos sa con pa duna e pueblo di pariba di nos isla e atention, ayudo, empuhe y e proyectonan necesario pa kibra e apartheid cu ta existi!”, Mike de Meza a conclui.