Lider di AVP, mr. Mike Eman:

Tur hende a bai atras !

Download raport di CBS

Lider di AVP, mr. Mike Eman a analysa e raport cu recientemente CBS a publica basa riba un investigacion cu nan a haci di entrada y gastonan di personanan na Aruba. Mr. Mike Eman ta splica cu CBS a entrevista un cantidad di 2294 persona (817 cas/famia) pa por haya un bista representativo di desaroyo di entrada y gastonan di personanan na Aruba.

Eman ta bisa cu e resultado di e investigacion aki ta confirma un preocupacion grandi cu AVP ta mirando den comunidad: tur hende a bai hopi atras den poder di compra. Rico, clase mediano y pober, tur hende a perde parti grandi di su poder di compra. E rapport di CBS ta compara su cifranan di 2006 cu esnan di un estudio similar haci na 1998. Ora mira e comparacion aki ta mira cu compara cu 1998 personanan na Aruba a bai atras den poder di compra drasticamente. Un persona den escala di salario di Afl. 3700,== pa luna a bai atras cu 11.9%, un persona cu un entrada mensual di Afl. 2500,== a bai atras cu 16%, un persona cu un salario di Afl. 1400,== (na 2006) a bai atras cu 17% y un persona cu ta cai bao di Afl. 1.000,== (por ehempel: pensionado soltero of onderstand) a bai atras cu 28.5%.

E lider di AVP, mr. Mike Eman ta bisa cu e cifranan aki ta dramatico, pasobra apesar cu e estudio aki a worde publica awor e “budgetonderzoek” aki a worde haci na 2006 promer cu introduccion di BBO cu a causa un inflacion di 10.2% na 2007 y ta siguiendo den e mesun rumbo (Juli 2008 nos ta na 6.1% caba).

Pesey Eman ta bisa cu ta urgente pa nos cambia e maneho di “tax and spend” di Gabinete Oduber urgentemente. Den su Presupuesto Alternativa AVP a mustra con por haci cambionan di prioridad y habri caminda pa inversion den enseñansa, infrastructura pa pais y barionan y pa trece un alivio pa pueblo cu eliminacion di BBO. BBO ta trece den caha di gobierno 152 miyon florin. Eman ta splica cu AVP ta bai elimina BBO den dos fase. Ta reducie promer aña na 1.5% y di dos aña cu e otro 1.5%. Esey kiermen cu mester sera un buraco di 152 miyon florin. Esey AVP ta haci cu reduccion di gasto y cambio di prioridadnan fiscal cu den e promer aña caba ta duna e 76 miyon florin necesario pa eliminacion di e promer mitar di BBO. Eman ta mustra riba e reduccion cu AVP a cuantifica den su Presupuesto Alternativa. AVP a entrega hunto cu su Presupuesto Alternativa un amienda den cual ta mustra “post pa post” ta unda lo corta gastonan inecesario pa yega na financia e maneho nobo di alivio, recuperacion di poder di compra y inversion den locual ta worde neglisha awor cu ta e estado di nos schoolnan, enseñansa, nos edificionan, infrastructura y condicion fysico di nos ciudadnan y barionan.

Mr. Mike Eman ta bisa cu gobierno cu su maneho ta kibrando e famia, nos empleadonan y nos empresarionan. Tur hende ta carga e peso di e maneho di “tax and spend” di Gabinete Oduber. Esaki awor ta keda proba un vez mas pa cifranan di e estudio cu CBS a publica. Den un reciente rapport di FESCA riba Economia di Aruba tambe a yega na un conclusion similar cu desde aña 2000 e ciudadano di Aruba a bai atras den su entrada real. “Esaki ta keda proba tambe den e estudio aki di CBS, den Parlamento AVP a insisti pa bini cu un estudio for di cual por a analysa e desaroyo di gasto y entrada di nos poblacion y awor cu e tey nos ta haya rason cu e mester a bin, Eman ta enfatisa.

“Pesey nos ta preparando den un forma profesional pa di promer dia di cambio por cuminsa traha riba e rumbo di cambio pa Aruba henter, rico, clase mediano, pober tur hende nos ta bai por constata un diferencia entre un maneho di “malgasta y tuma medida” cu un maneho profesional di “maneho responsabel y inversion pa futuro”, e lider AVP, mr. Mike Eman a bisa prensa cu hopi confiansa den e cambio y rumbo nobo cu AVP kier encamina pa Aruba.