AVP - CRISTIAN DEMOCRATA ARUBA
   

mr. drs. Arthur Dowers, Parlamentario AVP
PARTIDO AVP TA MANDA PREGUNTANAN RELACIONA CU
SLEEPING POLICE CU A WORDO KITA
E caso aki no ta para pasobra cu a kitanan,

awor mester responsabilisa pa placa di pueblo
Home > Centro di Prensa > Noticia > 20080826_a
 

ORANJESTAD (Cas di Partido) - E fiasco como consecuencia di e projecto di Sleeping Police di minister di husticia, Rudy Croes, manera tur hende tabata testigo ta uno minimalmente bergonsoso. Un famia di Rudy Croes, den e caso aki un primo a haya e contract pa por pone un cantidad di Sleeping Police den tur skina na Aruba. Algun dia despues cu nan a wordo instala tabata evidente cu e Sleeping Policenan aki ta tin un mal calidad. Tin algun di nan cu despues di algun ora caba a kibra. Banda di tur esaki, nan a wordo instala sin previo aviso y sin un borchi, causando asina hopi consternacion y mal contento den pueblo. Pareu cu e aparatonan aki a wordo instala tabata mas cu evidente tambe cu nan tabata causante di varios accidente.
 

Durante e conferencia di prensa semanal dialuna ultimo, parlamentario di e fraccion berde, mr. drs. Arthur Dowers a atende e topico aki. Si e responsabelnan pa e fiasco di Sleeping Police a kere cu door di kita e Sleeping Policenan e caso lo sera, nan ta ekiboca. E fraccion berde a manda un lista di pregunta for di parlamento den direccion di minister di husticia exigiendo aclariacion ariba henter e asunto di Sleeping Police.
 

Tempo cu a introduci e Sleeping Policenan e autoridadnan a haya hopi keho y protesta como consecuencia di e aparatonan aki. E tempo ey minister Croes a bisa cu “e ta hari nos”, segun sr. Dowers, “pasobra cu e ta haci y deshaci manera e ta haya ta bon”. E pregunta cu hopi hende ta haciendo awe, ta si e harí di sr. Rudy Croes awe ta comparabel na un “hende cu dolor di djente”.
 

Aki ta sigui un resumen di e preguntanan cu sr. Arthur Dowers, den nomber di e fraccion mas grandi den parlamento, a manda pa minister di husticia, Rudy Croes:
 
1   Exactamente, cuanto e projecto a costa; cuanto pa cada uno di e “sleeping policenan” y cuanto a cobra pa pone nan pa asina por haya un idicacion di e proceso a bay den un forma husto of no.
     
2   Kiko a causa cu mester a pone e “sleeping policenan” den un forma asina direpente y liher ariba caya.
     
3   Cua ta e estudio cu a wordo haci y si tin raport cu a conduci na ponemento di e “sleeping policenan”. Ta pidi pa suminstra parlamento cu e raport(nan) aki, si (nan) ta existi y kende a duna conseho pa ponenan y na unda nan lo mester a wordo poni.
     
4   Con a scohe pa e tipo specifico di “sleeping policenan” aki, contrario na usa e tipo di drempelnan cu ta wordo usa caba na Aruba.
     
5   Cua ta e costonan adicional. Pasobra varios di e “sleeping policenan” aki a kibra despues di algun dia di a wordo pone, y tin algun cu a kibra te hasta despues di algun ora.
     
6   Si e costonan pa remplaza e esunan cu a kibra a bay ariba cuenta di esnan cu a pone nan of ariba cuenta di pais Aruba.
     
7   Pa ken a costonan a bay pa kita e “Sleeping police”nan aki for di caminda. Si esakinan ta costonan adicional.
     
8   Ken a duna ordo pa kita e “sleeping policenan”. Si ta su mesun colega minister of tabata tin cualke otro indicacion, por ehempel di seguridad cu mester a kita nan.
     
9   Tambe tin entendi cu tin personanan cu a sufri accidente pa motibo cu e “sleeping policenan” y si ta conosi cuanto accidente a wordo causa pa nan.
     
10   Si tin gastonan cu e victimanan di e “sleeping policenan” aki a claim serca gobierno y si gobierno a asumi responsabilidad of si gobierno tin pensa di haci esaki.
     
11   Si e minister tin planan ainda pa bin cu un forma structura pa seguridad di trafico y cuanto esaki lo bay costa.
 

Segun parlamentario Dowers, e ta spera cu su fraccion por haya contesta mas liher cu ta posibel ariba e preguntanan aki, pasobra e tempo cu normalmente e minister aki ta tuma pa contesta preguntanan di parlamento ta sumamente largo.
 
 
 

top