Segun Otmar Oduber: Parlamento di Aruba ta Paralisa

su trabou di controla gobierno

ORANJESTAD (Cas di Partido) - Den Conferencia di Prensa di partido AVP, parlamentario Otmar Oduber a trece dilanti un desaroyo masha preocupante pa democracia na Aruba. Practicamente na Aruba no tin control di parlamento ariba gobierno. Te hasta pa un parlamentario por haya un documento di Centrale Accountantsdienst e mester tin cooperacion di e 11 parlametarionan di MEP. Esaki kiermen cu ningun documento cu MEP no kier pa parlamento wak, no por wordo investiga.

Ultimamente tin varios casonan di fraude ta sali un tras di otro, manera di Lands Laboratorium, Dump, Waf y Lotto pa Deporte, pero lamentablemente no tin ningun documento of raport disponibel pa parlamentarionan oficialmente ariba e casonan aki. E pregunta e ora ta: cuanto di e tipo di casonan aki tin cu ta scondi ainda? Parlamento no tin control ariba gobierno y pio ainda, gobierno ta totalmente intransparente. E desaroyonan aki ta duna esnan cu ta preocupa cu e estado di derecho y democracia na Aruba kippevel. Di un total di 171 raport cu CAD a produci for di 2003 pa juli 2007, parlamento mag di haya unicamente asina leu cu e 11 parlamentarionan di MEP a disidi.

Segun parlamentario Oduber, e desaroyo negativo aki a cuminsa for di tempo cu Marlon Werleman tabata presidente di parlamento. Bou di su maneho a introduci un regla cu yen di exigencia den caso cu un parlamentario haci un peticion pa un documento di CAD. Segun e exigencianan e majoria den parlamento mester duna OK pa un documento por wordo duna na e parlamentario(nan) cu pidi esaki. Esaki kiermen cu MEP tin un monopolio ariba e decision cua documento un parlamentario por haya y ken por haye. Y, segun Otmar Oduber, ta bisto cu e 11 parlamentarionan di MEP no ta move niun dede sin consulta cu nan lider den bestuurkantoor. Lamentablemente, bou liderazgo di Mervin Ras como presidente di parlamento despues di eleccion 2005, e maneho a keda identico na esun di su predesesor, Marlon Werleman.

E parlamentario di e fraccion mas grandi den oposicion a mustra tambe cu Algemene Rekenkamer (Controlaria General) tambe ta complice na e maneho aki, nengando di suminstra documentonan na parlamentarionan cu pidi esaki. Como prueba Sr. Oduber a presenta un cantidad di documento, incluyendo dos carta di Algemene Rekenkamer, cu oficialmente ta un organo di conseho di Parlemento.

Luna pasa, segun parlamentario Oduber, como parlamentario e la manda un carta via di presidente di parlamento pa Algemene Rekenkamer pa asina haya aclaracion ariba e cantidad di raportnan di CAD cu ta aparentemente hermeticamente sera for di bista di parlamentarionan di oposicion. Entre otro, Oduber a puntra cuanto di e raportnan di CAD Algemene Rekenkamer a ricibi y ariba cuanto di nan Algemene Rekenkamer a reacciona. Segun Otmar Oduber e preguntanan aki ta di suma importancia, pasobra aki ta trata di raportnan di casonan serio di fraude y corupcion, manera e caso di lands Laboratorium, Waf, Dump y tambe Lotto pa Deporte.

Parlamentario Oduber a lesa textualmente for di e carta di Algemene Rekenkamer pa esnan presente den conferencia di prensa y tambe a pone e carta disponibel pa esnan cu kier a lese: “Om te verwijzen naar uw brief d.d. 17 april 2008, verzoekt de Rekenkamer u hierbij aan haar mee te delen of uw brief d.d. 17 juli 2008 (preguntanan di parlamentario Oduber) alleen een doorleiding van de brief v.d. statenlid Oduber is of een verzoek van de Staten betreft, waarop een reactie van de rekenkamer wordt verwacht.” Increibel, pero berdad cu algo asina por pasa na Aruba na 2008.

Consecuentemente mester puntra, segun parlamentario Oduber, con parlamento por funcciona na Aruba? Un di e funccionan primordial y essencial di un parlamento ta esun di controla gobierno. Awe esey ta wordo haci imposibel door di Algemene Rekenkamer, Marlon Werleman (ex-presidente di parlamento di MEP) y Mervin Wyatt-Ras (actual presidente di parlamento di MEP). Algemene Rekenkamer ta e unico organo oficial cu por conseha parlamento. Awendia mester di majoria di parlamento pa por haya un simpel raport for di Algemene Rekenkamer y ken ta majoria den parlamento? E 11 parlamentarionan di MEP, segun parlamentario Oduber. Y pa pensa cu nan ta rabia ora cu jamanan pa “CHEERLEADER”.

Un pregunta importante ariba e funccionamento di parlamento ta awor: dicon un parlamentario ta huramenta individualmente? Kiko e huramento bal si bo mester puntra e 11 parlamentarionan di MEP pa bo por haya un raport pa bo por controla kiko gobierno ta hasi of laga di hasi. Esaki ta loke tin parlamento awendia totalmente paralisa.

Pero e parlamentarionan di MEP y Controlaria General mes por ta cu no sa mihor. Minister Nilo Swaen ta duna nan ehempel. Dilanti henter pueblo y medionan di prensa den un reunion publico den parlamento 2 aña pasa, Minister di Finazas Publico y Economia, Nilo Swaen, a priminti pueblo cu e lo cuminsa copia e raportnan di CAD pa ponenan na disposicion di parlamento. 2 aña despues, ainda e Minister y su conseheronan aparentemente no por caba di copia ni un raport.

Esaki ta e mentalidad dictatorial, segun parlamentario Oduber, cu partido MEP ta promove pa asina por sconde nan bagabunderianan, y lamentablemente nan no ta realisa cu ta pais Aruba ta sufri cu e consecuencianan. Djies tuma como ehempel e caso di fraude di mas di 10 miyon di florin cu a keda tapa pa tanto tempo! Te awe parlamento no por a haya un raport ariba e caso ey. Dios sa cuanto caso mas di fraude nan por a tapa y cu (nunca) nos lo haya sa di nan!