Parlamentario drs. Andy Lee

Dia 7 januari 2008, drs. Andy Lee, miembro di Parlamento pa e Fraccion di AVP a manda un comunicado di prensa cuestionando e importancia y seriedad cu Gabinete Oduber a indica di lo bai duna pa contene inflación den 2008. Awor, después di ocho luna, ta bon pa recorda cada un di e integrantenan di Gabinete Oduber di e promesa cu a haci pa contene inflación. E maneho cu lo a hiba pa contene inflación na 2008 ta resalta den su falta di resultado. Inflación te na mitar di 2008 ta mas preocupante cu na 2007. E unico inflación cu Gabinete Oduber ta bringando ta e inflación den credibilidad di su maneho.

Entre tanto ya no ta sorprendente cu e analysis na inicio di 2008 pa cu e maneho di Gabinete Oduber pa contene inflación, después di ocho luna ainda ta mes un actual. E politica barata di Gabinete Oduber ta keda bon ilustra den e siguiente comunicado di prensa cu a ser scirbi dia 7 januari 2008, cu e meta pa recorda ariba promesanan cu no por ser cumpli.

Meta pa contene inflacion den 2008:

E meta mas importante pa 2008 ta pa contene inflacion na Aruba. Esaki ta locual Gobierno di Aruba a anuncia na final di 2007. Inflacion den 2007 enberdad tabata un problematica grandi pa nos Pais. E impacto di prijs di energia y e impacto di BBO en particular a afecta nivel di inflacion na Aruba directamente y indirectamente. E nivel halto di inflacion na Aruba ta un refleho di e aumento drastico di costo di bida pa consumidornan y di aumento drastico di costo di operación di empresanan na Aruba.

Pero, kiko exactamente Gobierno kier realisa cu e meta pa contene inflacion? Ki problema exactamente Gobierno kier soluciona cu esaki? “Contene inflacion” kier meen cu ta trata na evita cu prijsnan general ta aumenta acceleradamente, manera a sosode den 2007. Conteniendo inflacion ta ensera cu prijsnan general lo sigui aumenta, pero di un manera menos accelera. Costo di bida lo sigui subi den 2008, ariba e nivel di aumento cu a experencia den 2007, esta ariba e nivel di alrededor di 9 porciento cu 2007 a conoce. Pues, cualnan ta e beneficio di e maneho di contene inflacion, y interes di kende(nan) esaki aki lo sirbi?

Aki no ta claro na interes di kende Gobierno lo contene inflacion. Si sali for di punto di bista y interes di e consumidor, e pregunta e ora ta: ki nivel di aumento di inflacion pa 2008 ta uno acceptabel? Of na ki nivel kier minimalisa aumentonan general di prijs den 2008? Ta juist aki Gobierno ta keda sin specifica kiko ta e meta en concreto cu nan ta boga p’e. Si tene na cuenta cu Gobierno a introduci BBO juist pa genera mas entrada pa financia gastonan publico halto, y sabiendo di antemano cu BBO lo ta hopi inflatorio, con e credibilidad di Gobierno ta pa contene inflacion den 2008? Ora ta pidi pa cada ken duna un man na juda contene inflacion den 2008, Gobierno mes ta e promer jama pa duna e bon ehempel. Aumentando gastonan publico constantemente den un forma desproporcional, Gobierno mes ta aportando activamente na accelera e nivel di inflacion na Aruba. BBO ta e ehempel bibo con Gobierno ta accelera inflacion, caminda e medida aki ta aporta na reforsa e impacto inflatorio di prijs di energia.

Conteniendo inflacion, Gobierno ta juda e consumidor un poco, pero den un forma no suficiente. Si realmente kier soluciona of remedia e problema di inflacion pa famianan na Aruba, anto mester contene of drecha e poder di compra di cada famia na Aruba. Pa hasi esaki tin dos forma di proceder: sea ta mantene activamente un equilibrio di prijsnan general na Aruba, of ta aumenta entrada di famianan pa compensa e perdida di poder di compra.

Bou di condicionnan actual, caminda prijs di petroleo ta aumentando constantemente, e promer forma di proceder ta ensera cu Gobierno mester hiba un maneho activo pa contene of reduci prijs di un gran cantidad di productonan ariba mercado pa por compensa e aumento di prijs a consequencia di petroleo. Esaki ta un instrumento cu Gobierno no ta disponiendo ariba sin mas, y pues no tin e poder pa realisa esaki actualmente. Locual si por hasi directamente ta reduci of sikiera mantene e costo di operación di e aparato gubernamental, asina cu no tin mester mas di tuma medidanan inflatorio manera BBO of aumenta invoerrechten.

Pa loke ta trata aumento di entrada di famianan pa compensa e perdida di poder di compra, mester remarca cu e forma di proceder aki semper ta bai a costo di entrada di otronan. Pa cu esaki BBO ta e ehempel bibo: Gobierno a aumenta su poder di compra a costo di e consumidor na Aruba. Mescos cu BBO, e decision pa aumenta entrada di famianan y reduci entrada di otronan, ta un decision politico. Ta keda na Gobierno pa bini cu iniciativa.

Esaki ta trece nos atrobe na e pregunta cardinal pa loke ta trata e meta di Gobierno pa contene inflacion den 2008: kiko exactamente Gobierno kier realisa cu e meta importante aki, y ki interes specifico e kier sirbi cu esaki? Ta bon pa specifica esaki. Cu Gobierno kier contene inflacion na 2008, ariba su mes ta un bon meta. Problema ta si cu no ta specifica cual problema y problema di cual grupo specificamente ta soluciona. Entretanto, ta e famianan na Aruba ta sigui hasi sacrificionan pa mantene entrada di otronan den nos comunidad, en particular e entrada di Gobierno. No por cuestiona e legitimidad di e decision di Gobierno pa aumenta su entrada a costo di famianan, pero e decisión ta keda uno moralmente cuestionable.

Politica ta un actividad serio, y mester tuma e encargo tambe na serio. No mester rebaha politica na entretenimento, caminda ta bini cu ponencianan pa cual no ta specifica e resultadonan concreto cu lo por spera di esakinan, cu e meta pa gana simpatia. E carácter di politica na Aruba mester cambia si nos kier sobrevivi den un forma mas intacto posibel e temponan dificil cu nos ta transcuriendo. Ta jega tempo pa cambia e actitud encuanto politica y introduci uno mas zakelijk, dirihi ariba resultadonan concreto.

Den e cuadro aki, Gobierno no mester hunga un rol populista di bisa cu ta bai contene inflacion mientras cu pa un parti importante ta e mes un Gobierno ta impone forsanan infatorio ariba nos, y caminda Gobierno no ta dispone di instrumentonan directo y ta carece di interes pa remedia e problemática di inflacion. Pa realmente remedia e problemática di inflacion Gobierno lo mester corta den su finansas publicas, y crea mas espacio pa otronan den nos comunidad por genera mas entrada. E seriedad di Gabinete Oduber IV pa realmente hasi algo na e nivel halto di inflacion na 2008 pues ta den su propio man. Ta keda na cada uno di e integrantenan di e Gabinete aki pa duna un aporte na contene inflacion na Aruba. Ta nan ta e promer jama pa cuminsa corta gasto publico. Credibilidad di e maneho pues ta den nan propio man.