Despues cu e comishon fiho di Salud di parlamento a reuni cu ODEA,

Miembro di parlamento pa fraccion di AVP, Alexander Tromp, kier a gradici na promer lugar e organisacion di enfermeronan di Aruba bao su presidencia di sr. R. Maxwell, pa nan tan interesante presentacion durante e reunion cu a ser llama door di e comishon fiho cu ta regarda asuntonan di Bienestar, familiar, Salubridad y Juventud di parlamento.

Den dicho encuentro hopi ta e informacionnan cu a ser treci dilanti door di ODEA na e miembronan di parlamento di dicho comishon fiho. Miembro di parlamento, sr. Alexander Tromp, kier a enfatisa cu e situacion di salubridad aki na Aruba ta hopi alarmante mes debi na e hecho cu no tin un structura riba maneho di salubridad en general. Un ejempel cu dicho organisacion a trese padilanti ta cu desde nos pais Aruba a drenta den su Status Aparte na anja 1986 automaticamente servicionan cu tawata ser duna tempo cu Aruba tawata forma parti di Antillas, a cay afor y no a tene cuenta pa a institui esakinan den nos salubridad aki na Aruba despues di Status Aparte. Un ejempel di esaki tawata e Instituut Psychiatrische Centrum situa na Corsow na unda cu patientnan cu problema mental por a wordo interna den dicho Centro. E parlamentario ta sigui bisa cu debi cu aki na Aruba no tin un Psychiatrisch Centrum, obligatoriamente ta interna esnan cu problema mental den e instituto di PAAZ, cu dicho instituto en principio no ta destina pa e patientnan aki. Un otro ejempel ta e patientnan cu desabilidad mental. Antes por a hasi un escohensia pa laga interna e patientnan aki na Corsow. Locual ta encera nos casnan di anciano no ta cos di papia mes y asina por continua cu e lista largo mes cu nos pais ta escarce di dje riba tereno di salubridad en general.

Un otro aspecto cu a bini dilanti ta e escarcedad di enfermeranan of enfermeronan. Antes Hospitaal mes tawata organisa e opleiding na unda cu e opleding pa enfermeria ta cumpli cu e standaardnan exigi. Lamentabelmente esaki ya no ta tumando lugar y consequentemente Hospitaal ta hanja su mes cu e escarsedad cu e tin actualemente cune of ta hanje obliga di tuma den servicio personanan cu un otro diploma cu kisas no ta cumpli cu e standaardnan exigi pa eherce e profeshon di enfermeria.

Un otro punto cu sigur a hala atencion ta cu aki na Aruba no tin e inspectie manera tawatin antes na Antillas. Un inspeccion estricto sigur sigur lo juda eleva e nivel di cuido di nos patientnan y mehora e cuido di nos salubridad aki na Aruba en general. Pero actualmente no tin nada nada di inspeccion di parti di Gobierno cu ta tumando lugar. Gobierno ta esun responsabel pa cu su pueblo y pesey mes mester percura cu tin un departameno di inspeccion cu ta eherce su responsabilidad estrictamente y debidamente pa asina evita cu tin institutonan priva cu tin di haber cu salubridad ta lanta ad hoc sin cu esakinan ta cumpli cu e standaardnan exigente riba tereno di salubridad.

Parlamentario Tromp ta hanja cu e lista ta hopi largo mes di tur e buraconan cu ainda mester wordo llena den nos salubridad y lo mas tristo ta cu Gobierno ta bezig ta ocupando su mes pa bini cu un centro cardiologo, centro medico etc. y sin tene cuenta cu tur e otro aspectonan cu ta hasi falta den nos Salubridad. Hopi biaha ora nos tende di salubridad nos pensamentonan ta bay dibiaha riba Hospitaal, Eerste Hulp, mediconan, deficit di AZV etc.. y sin tene cuenta cu e servicionan cu mester wordo duna na esnan mentalmente retarda, esnan cu problema mental, esnan cu deficienca fisico, nos grandinan cu mester di extra cuido medico y asina nos por sigui. Parlamentario Tromp ta hanja cu no tin un structura defini ainda riba tur e aspectonan aki menciona y cu mas pronto posibel mester bin cu un plataforma nacional unda stakeholdersnan manera Hospitaal, ODEA, Specialistanan, AZV, representante di aseguradonan y Volksgezondheid mester instala un comishon pa asina na cuminsa na busca solucionnan cu ta na bienestar di e patientnan pero tambe pa esnan cu ta eherciendo e bunita profeshon den cuido di salubridad.

Por ultimo miembro di parlamento sr. Alexander Tromp kier a desea sr. R. Maxwell y esnan cu ta forma parti di e Organisashon di Enfermeronan Aruba (ODEA) hopi forza den nan ehemplar trabao door di sali na vanguardia na bienestar di nos salubridad en general.