Parlamentario drs. Andy Lee

Na inicio di 2006 a surgi un discussion publico encuanto pobreza na Aruba. Un grupo creciente den nos comunidad tabata tin dificultad pa mantene cabez riba awa. Situacion economico di famianan na Aruba tabata birando dificil, rekiriendo di ayudo pa por sali afor. Gobierno e tempo ei a hala tur responsabilidad un banda indicando cu lo mester determinia promer kiko exactamente ta pobresa, pa por identifica e “target group,” y diseña maneho pa ataca e problema si resulta necesario.

KETO BAI WARDANDO ARIBA E DEFINICION

Dos aña y mei despues ainda nos ta sperando e definicion di pobreza pa Aruba. E pregunta cardinal ta naturalmente kiko Gabinete Oduber a haci mientras tanto cu e issue aki? Cuanto tempo y cuanto estudio ta rekeri pa jega na definicion di pobresa na Aruba, pa asina hasi algo na e caida den nivel di bida di hopi famia na Aruba? Un postura pro activo di Gobierno den e ultimo dos aña y mei lo por a contribui na resultadonan confiabel encuanto di e situacion social – economico di famianan na Aruba, habriendo porta pa accionnan necesario di parti di Gobierno pa juda remedia e situacion. Falta di definicion y midimento di pobreza nunca por ta un obstaculo pa cuminsa tuma accion pa remedia e situacion dificil cu hopi famianan na Aruba ta travesando.

AUMENTO DEN COSTO DI BIDA TA ALARMANTE

Durante e ultimo dos anja y mei aumento den costo di bida na Aruba a accelera drasticamente, mientras cu entradanan no a cana den paso cu e aumento den costo di bida. Famianan cu na 2006 tabata conoce situacion financiero dificil caba, y cu dificultad por a mantene cabez riba awa, awendia ta den mas dificultad. E aumento drastico den prijsnan general na Aruba a conduci cu mas y mas famianan ta hanjando nan mes den preta financiero. Si na momento cu bo ta wardando ariba un studio pa determina definicion di pobresa na Aruba, bo a cana den pueblo y realmente pone atencion ariba locual famianan ta conta y demonstra di nan situacion social - economico dificil, un estudio tocante di pobresa solamente lo verfica y pues fungi como hustificacion di accionnan di Gobierno pa juda den e situacion general di caida den nivel di bida na Aruba.

LEU DI REALIDAD OF LEU DI IDEOLOGIA?

Un splicacion pa e inaccion di parti di Gobierno ta cu integrantenan di Gabinete Oduber a perde contacto cu hendenan na Aruba y no tin nocion di kiko ta pasando den hogarnan riba nos isla, ilustrando con leu di realidad Gobierno por ta canando. Un otro splicacion ta cu e partido social democrata cu ta na mando ta pone e responsabilidad pa cu situacion social – economico serca e individuo mes, y pues no ta asumi responsabilidad alguno ariba e tereno aki. Ora di scucha Promer Minister ta bisa cu Aruba no tin pobresa paso tur hende ta bai Carnaval of ta malgasta placa den casino y otro fiestanan publico, ta obvio cu e partido social democrata no ta asumi ningun responsabilidad pa situacion social economico di famianan na Aruba, ilustrando con leu di su propio ideologia e partido social democrata por ta canando. Realidad ta cu e promesa pa prosperidad pa Aruba ta resultando un promesa bashi.