MIKE EMAN TA DUNA LECTURA NA UNIVERSIDAD DI LEIDEN

Invitacion  

Diahuebs awor, dia 27 di november, lider AVP, mr.Mike Eman lo duna un lectura na Universidad di Leiden. El a wordo invita pa e institucion di studiantenan SIAA (Societas Iuridica Antilliana et Arubana) pa bin duna un lectura riba e ultimo cambionan den e Ley di voto pa Union Europeo (Kieswet). E lectura aki lo wordo teni na e Facultad di Hurisprudencia na Leiden.

E lectura lo trata e cambionan cu a wordo introduci como resultado di e veredicto di Corte di Husticia di Union Europeo den e caso Eman/Sevinger vs Gemeente Den Haag. Como consecuencia di e cambio di e Kieswet tur habitante di Antiyas y Aruba por vota na e eleccion Europeo cu lo tuma lugar otro aña dia 4 juni 2009. E veredicto ta un logro grandi y un victoria pe e pueblonan Antiyano y Arubano cu awor tin un bos tambe den Union Europeo.

Mr. Mike Eman tin dos titulo den derecho. Uno den Ley general y un den ley notarial. Durante e ultimo anjanan e a specialisa su mes tambe den e posibilidad huridico y economico cu un relacion nobo cu Union Europeo por ofrece. A base di su esfuerso awe Reino Hulandes ta dunando atención na studia con por duna un mihor contenido na e relacion di Antiyas y Aruba cu Union Europeo. Recientemente a sali un rapport pa mira con por duna mas contendo na LGO cu lo termina dentro di corto si no haya un contenido nobo y awor a sali dia 17 di oktober un rapport nobo riba UPG. Den esaki Union Europeo ta cualifica e regionan cu e status Utrapereferico como su “troef”. Union Europeo den e nota aki ta dicidi cu e regionan aki, nan locacion den mundo y clima destinto cu esun di Union Europeo ta haci nan e lugar strategico pa creación di centronan internacional di investigacion riba energia alternativa, “oceanografia”, “klimatologia” etc. Riba cada un di e teritorionan aki ta bai worde estableci centronan di estudio y investigación pa avansa conocemento riba e materia y sirbi com vitrina pa Union Europe den resto di mundo. Esaki ta oportunidadnan grandi cu un posición di UPG hunto cu tur su fondonan di desaroyo y sistema di calidad ta ofrece.

Mr. Mike Eman ta enfatisa cu e derecho di voto adkiri ta importante pa tur hende. No ta importa si bo ta pa LGO of UPG, e hecho cu nos ta haya derecho di voto ta duna nos mas entrada y influencia pa sirbi nos interes na Union Europeo. Si bo kier drecha LGO of bo kier haya e mihor pakete di UPG posibel, pa cualkier di dos, e derecho di voto ta duna nos mas voz. Durante di e ultimo Bipartiet na Aruba, entre Parlamento di Antiyas y Aruba, e delegacionan parlamentario unanimamente a pone den e “slotverklaring” cu e logro di derecho di vota ta hopi importante y cu nan ta haci un apelacion riba nan gobiernonan di Antiyas y Aruba pa stimula e participacion na eleccion pa Parlamento Europeo.

Na Hulanda mr. Mike Eman lo atende cu diferente otro materianan importante tambe den luz di e crisis internacional cu ta afecta Aruba. Eman lo sostene reunionan den cuadra di haci Aruba mas fuerte pa por supera e periodo dificil nos dilanti y pone e base pa cooperacion cu institutonan di research y desaroyo pa haci Aruba un pais cu ta resalta den calidad di bida.

Despues di e lectura interesante aki lo tin oportunidad amplio pa e docentenan, studiantenan di ley y bishitantenan atendiendo e lectura elabora cu mr. Mike Eman riba e tema aki.

Mas Informacion