Siman pasa miembro di e fraccion berde den Parlamento mr Alex Tromp a entrega un mocion en cuanto retribucion di placa di belasting di cuidadanonan. Un tema hopi actual y un mocion cu sigur tabata na beneficio di e pueblo di Aruba. Lamentablemente fraccion di MEP a vota contra e mocion importante aki.

Miembronan di fraccion di MEP a pidi stemadvies di nan Minister – sr.Swaen – y siguiendo su instrucionnan nan a vota NO contra un mocion cu por a trece alivio pa un gran cantidad di hende. E mocion aki tabata pa gobierno instrui e departamanto di belasting pa prome cu manda dwangschrift y aanmaningen y pa prome cu pone beslag riba salario di hende, pa verreken e placa cu gobierno debe e cuidadanonan di Aruba y pa sea nan paga solamente locual te resta of pa nan haya placa bek.

Awor ta asina cu hopi hende casi no por cumpli mas cu nan paganonan di belasting dor di e situacion financiero precario cu nan ta den. Dor cu nan no por cumpli cu nan debe di belasting na tempo, gobierno cu tin e poder administrativo ta pone interes riba e debe, subiendo esaki mas ainda y hincando di e forma aki e pueblo di Aruba den mas debe ainda. Y ultimo tempo ta un tras di otro e cobransanan di belasting ta sali. Pero, di otro banda, gobierno debe un gran cantidad di hende placa cu nan a paga di mas. Tin hende cu mester haya placa bek for di 2004, 2005, 2006 y 2007. Riba e placa aki si Belastingdienst no ta pone interes dor di incumplimento di parti di gobierno. Tur e hendenan cu mester haya placa bek ta yama belastingdienst pa puntra con leu nan papelnan ta pa haya e placa aki bek y no ta hayando un contesta positivo.

Awor tur hende cu sano huicio lo puntra su mes ta kico por ta e motibo cu MEP a vota contra y kico a conduci e Minister en cuestion pa duna un negatief stemadvies. Segun miembronan di e fraccion di MEP den Parlamento e motibo ta cu Minister Swaen a bisa nan cu cosnan ta bai wordo regla. Esaki sin duda ta un splicacion straño pa tur esnan cu mester haya placa bek, pasobra te ainda nada no ta regla y gobierno ta sigui cobra belasting na un forma inhusto y no ta cumpli cu pagamento bek. Mr Alex Tromp a haya un cantidad di yamada di hendenan cu ta apoya su mocion y ta rabia cu e actitud di fraccion di MEP den e caso aki.