Awetardi un team di 4 studiante gradua den ingeneria na Universidad di Michigan lo ta yegando Aruba pa asina duna charlanan na diferente scolnan tocante energía alternativo y pa introduci nan Auto Solar cual nan a competi cune den diferente compentecianan na Merca y rond di mundo. Esaki ta un iniciativa di e organisacion di Science Fair Think Green di AVP conhuntamente cu hobenan di HAC.

E team di Auto Solar di e Universidad di Michigan ta un organización no lucrativo y completamente di studiante, cual nan proposito ta di diseña, financia, construi y competi un vehiculo di energía solar den competencianan rond di Merca y di mundo. Nan ta dedica na e desaroyo di nan miembronan manera companjeronan di equipo, educadornan, y lidernan, y na e educación di nos comunidad den e potencialnan di technologia alternativo di energía.

E studiantenan cu ta ofrece nan mes manera voluntario di e Auto Solar ta tipicamente studiante cu ta bin di un gran variedad di disciplina académico, incluyendo e area di Ingeneria, Business, Literatura, Ciencia y Arte. Cada projecto ta opera den un ciclo di 2 anja y mas ku 200 studiante por wordo mira ta participa den e team.

E team ku lo ta biniendo Aruba ta consisti di entre otro:

David Mazur, naci na Zuid-Oost di Michigan, na unda e la gradua na Universidad di Michigan como Ingeniero Informatico. E la uni ku e team di Auto Solar na anja 2004 y e la asisti e team pa gran parti den e area di strategia. Den 2006 David tambe a sirbi como Director di Strategia.

Jeffery Ferman ta un recién gradua di Universidad di Michigan, completando un Licienciatura den Ingeneria Informatica, ku un certificado den Fisica, Matematica y Arqueologia Clasico. Pa mas ku 4 anja e ta forma parti di e team di Auto Solar, unda Jeff su rol iniciativo tabata den e Division di Strategia di 2005. Jeff desde e tempo ey tabata tin rolnan manera Lider di Strategia pa e 2007 “World Solar Challenge” y Manager di competencia pa e 2008 “North American Solar Challenge”.

David Masselink ta un studiante doctorado na Universidad di Michigan, unda ku e ta studiando Ingeneria Informatico. David tabata e Lider di división di Micro-Controller pa e project di 2005.

Joseph Belter ta actualmente un studiante gradua di Universidad di Michigan, studiando Ingeneria Bio-mecanico. Manera un miembro caba di 5 anja di e team di Auto Solar, Joseph ta responsabel pa diseña y construi componente di suspensión, y a sirbi como conductor pa e “North American Solar Challenge” y e “World Solar Challenge”. Te e dia di awe e la yega di core mas ku 5,000 miya den e auto solar di 2005. Desde e competencianan, Joseph a adquiri un interés den aplicación di ingeneria pa e area medico. E la diseña desde e tempo ey equiponan robotico pa cirugía y a mejora e diseño di marcapaso pa Medtronic Inc.

Recientemente e lider di AVP, Mike Eman riba invitacion di Ivo Hagemans di Universidad di Delft tabata di bishita na e garage di Nuna 4 na Universidad di Delft. Esaki ta e auto solar cu a sali campion di e ultimo competencia na Australia. Ivo Hagemans recientemente tabata na Aruba riba invitacion di e organisacion di Science Fair Think Green di AVP pa duna lectura riba e auto solar y energia alternativa. Awor Universidad di Michigan ta bin Aruba cu e campion di Merca, Momentum. Mike ta hopi contento cu e contactonan cu nan tin Universidad di Michigan y e Universidad di Delft. “Aki ta unda hopi avance scientifico ta worde haci y nos ta haye importante pa nos hobenan y futuro oportunidadnan economico pa Aruba pa nos desaroya relacionan di cooperacion cu e institutonan aki”, Mike Eman ta expresa.

Lider di AVP, Mike Eman y dirigente di HAC, Silvia Gildhorn ta enfatisa cu mirando cu mundo ta cambiando y tur hende ta bira wak den direccion di energia alternativo, e organisacion di Science Fair Think Green di AVP conhuntamente cu hobenan di HAC a haci e tema di energía alternativo un issue importante. Ta mas cu logico cu pa e motibo aki grupo di studiantenan asina ta wordo invita pa forma parti di e concientisacion di e tema Think Green.