E programa radial e biaha aki a enfoca riba Minister Marisol Lopez-Tromp cu ta cometiendo un pifia tras di otro, ta malgastando placa di e pueblo pagado di belasting den asuntonan priva y familiar y ta nenga rotundamente di bin duna cuenta na pueblo. Cuanto mas e ta kere cu e por sigui cu e actitud di malbado aki? Ta pesey cu srs.Melvin Tromp y Marlon Sneek kier a haya contesta riba tur e preguntanan aki. No solamente riba tereno social Minister Marisol ta un fracaso, pero sigur tambe riba tereno di enseñanza. Cuanto mas pueblo mester sigui guli, prome cu e hendenan realisa cu mas y mas nan ta hundiendo Aruba? Otro asunto peculiar cu a bin padilanti ta e hecho cu awor Prome Minister di Aruba kier pa lider di oposición bai Hulanda pa yude regla e asunto di Plant NV. E mes a bisa esaki den un programa na radio. Un asunto cu ta tranca malamente y awor cu Nelson Oduber kende tin pelea mahos cu tur hende y no ta mirando solucion e kier pa Mike Eman sali na su vanguardia. Esta tristo. E asunto di Valero tambe a wordo discuti durante e programa radial di partido AVP. Pakico e gobierno aki un biaha mas ta core cu esnan cu ta opera nos rafineria. Esaki no ta prome biaha. E actitud soberbe di e gobierno aki y en particular di Prome Minister di Aruba Nelson Oduber a hiba Aruba na rand di bancarota. Nos economia a cai den otro, nos finanza ta den intensive care, nos turismo ta cayendo, nos enseñansa ta malisimo, nos futuro ta na peliger y e gobierno aki ta sigui fiesta na grandi cu nan Friends & Family. Ki abuso!