AVP - CRISTIAN DEMOCRATA ARUBA
   

Programa Radial di AVP a cuminsa delinja e rumbo di nos pais
E TOPICO MAS IMPORTANTE TABATA E PRESUPUESTO
ALTERNATIVO NA CAMINDA
Home > Programa Radial > 20071125
 
       
     
   

 

  
       
   

 
       
       
   

 
       
       
   

 
       
       
   

 
       
       
   

 
       
       

Diadomingo ultimo, Partido di Pueblo Arubano, AVP, a transmiti for di Alto Vista un otro edicion di nan programa radial di tur siman. Habriendo e programa, Mike Eman, a grandici Shon Titi, pa a habri su potranan pa e programa di e partido y tambe a introduci e demas oradornan den e programa. E la cuminsa pa introduci parlamentario di AVP, di Nord, Alexander Tromp. Alvin Giel, John v/d Biezen y Melvin Tromp tambe tabata presente, hunto cu un cantidad di persona mas cu tabata di bishita na cas di Shon Titi na Alto Vista.

Mike Eman a splica cu e ultimo simanan partido AVP a pone accento ariba e tema di comunitarismo, pasobra nos kier trece bek e sentido comunitario di nos pueblo. Caminda cu famianan ta juda otro y bisiñanan ta solidario cu otro. E balor, norma y sentimentonan aki di convivencia y solidaridad cu esnan di menos recurso y cu mester ayudo a bay perdi durante añanan. Naturalmente cu no por trece bek tur cos di antes, pero e sentimentonan aki ta hopi importante pa nos purba trece nan bek. Ta e tipo di sentimentonan aki ta loke ta lijm un sociedad bek na otro.

Sr. Eman tin un preocupacion grandi pa e manera cu e gobierno aki ta hasi gastonan grandi na nomber di pais. E gastonan aki no ta na beneficio di e pais, pero exclusivamente na beneficio di esnan cu ta plunder e pais aki. Nan no ta beneficiando skolnan, comunidad of nos grandinan cu e gastonan aki. Pesey mes Partido di Pueblo Arubano, AVP, ta trahando duro pa trece cambio den e rumbo cu nos pais ta bayendo, pasobra nos comunidad mes no ta haya e frutonan di su mesun labor.

Un di e trabounan cu partido AVP ta trahando duro cu ne ta e asina jama, tegen-begroting, contra-presupuesto of simplemente un presupuesto alternativo. Esaki ta algo cu pa prome biaha den historia di Aruba, un partido den oposicion ta trece algo asina dilanti. Expertonan, tanto local como internacional, a bin ta traha inmensamente duro ariba e projecto aki, cu lo bira algo hopi importante pa futuro di Aruba.

E accento lo ta pa para e deterioro na Aruba, para e caida fisico, caminda cu mester inverti den scolnan di nos muchanan, den asistencia social, promocion y mantencion di nos turismo. Tur esaki pa porfin nos pueblo cuminsa sinti cu tur e recursonan cu e pais aki tin, ta wordo usa pa e progreso di e pais. E parti di mas grandi di e presupuesto alternativo, cu pueblo ta anhelando, ta e revocacion di BBO. Mike Eman a sigui splica cu AVP “lo revoca BBO den dos fase y e forma cu AVP tin pensa di hasiele ta dor di reduci gastonan innesesario di gobierno, pone accentonan nobo di impuesto caminda cu nan mester ta y habri caminda dor di reduci e gastonan innesesario di gobierno pa hasi inversionan y cuminsa cu revocacion di BBO.”

Sr. Eman a sigui splica cu den e simanan cu ta bini, lo bay splica den detayes con e buelta grandi aki lo wordo treci den e presupuesto alternativo. Esey naturalmente ta bay ta e prome luz, cu pueblo ta bay cuminsa mira pa futuro di e pais aki. Nan ta bay mira cu Partido di Pueblo Arubano, AVP, no unicamente tin un pensamento of un proposicion, pero e partido lo presente den un forma cuantifica y detaya.

Parlamentario di AVP, Alexander Tromp a mustra riba e hecho cu e presupuesto alternativo tin un meta tras di dje. Drecha bek e decadencia di e ultimo añanan. Di otro banda, Alex Tromp, ta hopi preocupa ariba e hecho cu via di Tele Aruba ta pasa propagandanan cu ta costa pueblo di Aruba miles y miles di florin pa asina purba convense pueblo cu cos ta bon. P kiko mester paga asina hopi placa djies pa bisa cu gobierno ta bon? E propagandanan fantasma di “Aruba ta progresando” y “Aruba den Pleno Progreso” ta ehempelnan bibo di gastamento di placa di pueblo. Si gobierno a traha bon, no tin mester di propaganda di esey! Contrario na esaki e presion di costo di bida ta muestra bibo cu nos pueblo ta den un decadencia social y economico. Candidato riba lista di Partido di Pueblo, AVP, Alvin Giel, a enfoca riba e problemanan economico y tambe di criminalidad cu e ta mira den Pueblo. Segun sr. Giel, ta mustra cu un otro ola di aumento di prijs lo bay drenta atrobe e aña cu ta bini, pasobra cu comerciantenan no por a procesa e aumento di BBO corectamente cu e consecuencia cu nan ta hibando perdidanan grandi. Pa loke ta criminalidad, e ta splica cu esaki ta birando dia pa dia mas pio y no tin un solucion den bista. Kiebronan di auto y ladronicia en general ta na ordo di dia y segun gobierno, Aruba ta progresando. Ta con esaki ta? Niun hende por compronde. Un cos sigur ta cu e gobierno aki ta hasi nada pa trece alivio.
           
 

 

 

           
     
           
       
           
John v/d Biezen su enfoke tabata riba riba e problema structural di “friends & family” di e gobierno di MEP. E manera di traha aki, ta tipifica e partido aki. Jegando cas di Shon Titi, Sr. v/d Biezen ta splica cu e tambe por a mira con un brug cu ta wordo traha cu a costa hopi miles di florin pa famia y djies un paar di meter leu por mira un scol ta wordo lubida den decadencia.
Un otro candidato di AVP presente na cas di Shon Titi, ta mustra cu e partido di AVP, cu tin un cantidad di hende cu ta cla pa traha y lucha pa e pais aki. Nan ta esnan cu lo mustra cu ora bo tin e pueblo na curazon, cosnan bon por wordo hasi. Ora un gobierno, manera esun di MEP, ta suta pueblo cu medida tras di medida, no por tin mas excusa. Despues di 6 aña den gobernacion, e unico constante di e partido MEP, tabata medida y tur tipo di aumento di prijs. Pueblo sa cu den partido AVP nan tin e solucion y cu Mike Eman como lider, nos por ta sigur cu Aruba lo por cambia di e rumbo cu e ta actualmente aden y bay den un direccion positivo.
Na final, Shon Titi Tromp a tuma palabra gradiciendo un y tur presente pa nan bishita. Tambe e kier a tuma e oportunidad pa desea pa tur cos bay bon cu partido. Pasobra e ultimo añanan, a pasa hopi cos cu consecuencia cu hopi hende lo pasa un pasco tristo e aña aki. Shon Titi ta splica cu tin hendenan cu moda pa sobrevivi, pero tin hopi mas cu no tin moda pa ni cumpra paña. Cu lagrimanan den su wowo y hopi emociona, Shon Titi a sigui splica cu tin hopi famia cu tin di pasa den duro pasobra nan no tin suficiente ni pa cumpra mas basico. Na final, Shon Titi a pidi Dios pa duna partido AVP bendicion y briyo pa hasi loke mester wordo hasi pa e pais aki.
Terminando e programa, Mike Eman a segura Shon Titi y henter peublo di Aruba, cu un gobierno di rencor manera esun cu nos tin na e momentonan aki, hamas y nunca mas mag di ripiti ariba e isla aki, pasobra ta esey mes a hasi cu partido MEP no por a goberna. Cu e siguiente palabranan yen di inspiracion, Mike Eman a sera e programa: “Tur dia nan ta sinta pensa con nan por perhudica otro hende, pero nan no ta lanta niun dia pensa con nan por juda e pais aki. Nan no ta soña pa otronan, nan ta soña pa nan mes.
Click aki pa mas tocante di programa radial di AVP
 
 
 

top