PROME PROGRAMA RADIAL DI AVP TA PONIENDO ATENCION NA

PIEDRA PLAT – Diadumingo ultimo partido AVP a reanuda su programa radial di tur siman. E programa a wordo transmiti for di cas di famia Reina na Piedra Plat y a crea un ambiente ameno na Piedra Plat 30. Presente di partido AVP tabata miembro di fraccion di AVP den parlamento di Aruba, Alexander Tromp y miembronan di partido, Calrisca Velasquez y John van der Biezen.

		Clarisca Velasquez

Clarisca Velasquez a habri e programa, jamando un bon bini na tur esnan presente y tur radio oyente. E la manda un danki di curazon na famia Reina cu a habri porta di nan cas pa representantenan di e partido por a hasi e transmision. Clarisca a sigui splica cu tin un incertidumbre grandi den pueblo ultimamente. Sigur si mira loke ta pasando cu AZV y tambe un djies cu SERLIMAR. E problema segun e candidata di AVP ta cu e gobierno aki, hunto cu e 11 miembronan di staten di MEP, no ta serio den nan maneho y ta hasi uso di recursonan di pais Aruba pa favorece asuntonan cu no ta na beneficio di nos pais. Di otro banda Clarisca Velasquez a mustra cu AVP si ta hopi serio den nan trabou, pasobra nan no ta opone e maneho di gobierno di MEP djies pa opone. Prueba di esaki ta e AMIENDA cu partido AVP a presenta den tratamento di presupuesto di aña 2007 di pais Aruba. Den e tratamento di presupuesto di e aña siguiente di pais Aruba, partido AVP a bay mas leu ainda y a presenta un PRESUPUESTO ALTERNATIVO. Asina e partido a mustra cu e no ta djies papia pa papia, si no ta presenta con nan ideanan por wordo hasi realidad.

Un hecho cu parlamentario Alex Tromp a tuma tempo pa reacciona ariba dje ta cu for di direccion di MEP y otro partidonan, ta sali e frustracion cu AVP kier baha e cantidad di trahadornan den sector publico. Segun esnan di MEP y otro partidonan, AVP lo kier kita hende for di trabou. Parlamentario Alex Tromp kier a refuta esaki categoricamente. Segun e parlamentario, e integrantenan di MEP no a compronde presupuesto alternativa. Por ta cu esaki ta e consecuencia cu e presupuesto alternativa a wordo skibi na Hulandes? Por ta intencionalmente of no, pero MEP a scohe pa no compronde e documento. E palabra “natuurlijke afvloeing” ta splica tur cos. Loke AVP ta propone, ta cu mester bin un moratorio ariba tumamento di personal nobo den gobierno. E natuurlijke afvloei ta referi na, por ehempel, ambtenaarnan cu ta bay cu pension, ta retira of por ehempel ta fayece, cu no mester wordo reemplaza. Asina aki pais Aruba por recupera bek di daño cu e peso financiero di e aparato tin ariba su finanzas. E idea ta uno simpel, pero integrantenan di MEP ta scohe pa no compronde e idea, pasobra e no ta combini nan.

Na final di e programa Clarisca Velasquez a gradici tur presente y particularmente tambe e radio oyentenan pa nan atencion y a invitanan pa sintonisa Canal 90, otro siman pa 3:00PM pa un otro edicion di e programa radial di di tur siman di AVP.