d.r.p.d.: Mike de Meza, Melvin Tromp y Lorna Varlack

SAN NICOLAS – E programa radial di AVP e siman aki a wordo transmiti for di Nijhoffstraat na San Nicolas. Lorna Varlack, educadora y candidata ariba e lista di AVP, a habri porta pa e programa cu ta wordo transmiti via Canal 90 tu diadomingo. E siman aki e programa a wordo modera pa parlamentario di fraccion di AVP, Mike de Meza, candidato di pariba di brug Melvin Tromp y e anfitriona Lorna Varlack mes.

		Lorna Varlack

E topiconan e siman aki tabata topiconan hopi actual y esun cu mas a resalta, ta e situacion economico fatal cu nos pueblo ta aden. Pa via di e desaroyonan negativo despues di introduccion di B.B.O. por a mira un decadencia den e situacionan na scolnan. Scolnan ta den mal estado y hopi di nan no tin ni e minimo pa nan por educa nos jiunan di un manera apropia. Pero e situacion pesimo no ta unicamente limita na e parti fisico di e scolnan. E muchanan, segun sra. Varlack, ta duna señalnan cu nan tambe ta sufri di e situacion economico. Un ehempel cu e la menciona ta muchanan cu no ta bin cu paña y keds adecua scol, pasobra cu e situacion economico no ta permiti. Hopi biaha, ta e educadornan mes tin cu acumula paña for di nan mesun iniciativa, pa por juda muchanan. Cuminda ta un otro aspecto dificil pa hopi mucha. Atrobe ta educadornan tin cu tume ariba nan mes pa trece cuminda pa muchanan por come. Pero e responsabel, gobierno, no ta parce di tin interes pa soluciona e tipo di problemanan aki.

		Mike de Meza

Mike de Meza, un di e politiconan mihor conosi pariba di brug, a comparti su desapunto ariba e rumbo cu nos pais ta bayendo. Aruba ta pasando den un situacion economico pesimo y cu tin consecuencianan social serio y real pa nos pais. Segun de Meza, e problemanan social por mira y ta algo cu e no por compronde con e representantenan di partido MEP ta bira cara pa nan. De Meza a mustra ariba e debenan astronomico cu gabinete Oduber ta haciendo. Mike a sigui splica cu partido MEP ta papia cu nan a paga debenan di pasado y ta cu pesey nan no tin placa. E pregunta ta keda e ora, ta dicon e debenan a subi anto? For di tempo cu MEP a drenta gobierno, debenan di pais Aruba a redobla. Si a paga debe, e debenen di pais Aruba mester a baha, pero esey no ta e caso.

Un pregunta categorico y al caso di Sr. de Meza, tabata ta: “E situacion na Aruba na 2001 tabata mihor cu e ta awe?” Esey ta un pregunta cu mayoria di pueblo ta contesta cu un SI categorico. E situacion a bira malo cu entrada di gabinete Oduber, na final di 2001. E gobierno di MEP a causa chaos tras di chaos den e aparato gubernamental, e situacion financiero di nos isla y e situacion economico. Nan a causa chaos den insitutonan cu tin di controla y conseha gobierno, sindicatonan y gremionan comercial.

Den e proximo gobierno, segun sr. De Meza, Aruba lo haya un mihor trato. E gobierno cu AVP lo trece pa Aruba lo ta uno cu lo tin como meta e bienestar di pueblo di Aruba y no uno un grupito: “Friends & Family”. Partido AVP tin Aruba na pecho y tin un vision na unda e pais aki mester bay, pa asina nos jiunan por ta para ariba bon pia pa asina nan por percura pa nan jiunan tambe por tin un mihor mañan.

E siguiente programa radial di AVP lo wordo transmiti for di Dakota, Diadomingo 9 di maart 2008 pa 3’or di atardi via Canal 90 FM.